Italy-a lung chhawrdawh intiang lar tak, ‘Lovers’ Arch’ tia an sawi chu ni eng emaw zat nasa taka ruah a sur hnu leh thli na tak a thawt hnuah Valentine’s Day khan a chim.
Melendugno, Puglia-a Sant’Andrea-a lung lian tak, a laia kua hi khualzinten an tlawh nasain innei tura insawmna (wedding proposal) hmun lar tak niin Adriatic vaukama hmun lar ber pakhat a ni.
“Hei zet hi chu Valentine’s Day gift duhawm lo tak a ni,” tiin Melendugno Mayor Maurizio Cisternino-a chuan tual chhung chanchinbute hnenah a sawi.
An region tan leh khualzinte tan ‘thil pawi tak’ a nih thu a sawi bawk a. “Khualrelin a din a ni a, a la let leh ta a ni,” a ti.
A chim tih hi a bula kalten Pathianni tuk khan an hmu a. Thuneitute chuan khaw awm dan uchuak tak, Storm Oriana an tihin a nuai chhiat niin an ngai a, Italy chhim lamah kar hmasa khan ruah tam tak a thlen a, lei leh lung a ei ral nasa a, chu chu a chim chhanah an ngai a ni.
“Kan region chhinchhiahna pakhat, kan thil hlu tak kan chân a ni,” tiin Puglia regional President Antonio Decaro chuan Thawhtanni khan a hmunah thuthar lakhawmtute a hrilh.
“Vanduaithlak takin khuarel thil lo thleng hi a nasa tak em em zel a, Storm Oriana tawp lam pawh kha na tak a ni,” a ti.
Decaro-a chuan thuneitute pawhin tuipui kam luang ral chak lutuk tur leh a venhimna turin ngaihtuahna an sen thuai a tul hle tih a sawi bawk.
Arch awmna, Salento region hi Italy-ah pawh khualzinten an tlawh tam ber pawl zinga mi a ni.