Assam Chief Minister Himanta Biswa Sarma-a chuan Thawhtannia an party chhuahsantu, state Congress president hlui, Bhupen Kumar Borah-a chu Pathianniah BJP-ah lawm lut dawn tih a sawi.
Sarma-a’n an party a zawm dawn tih a sawi lai mek hian kum 55 mi, Borah-a hi an party hruaitu lawkte chuan a bânna an pawmsak duh lo va, hnukkir leh turin an ngen a ni.
Thawhlehni tlaia Guwahati-a a chenna ina Borah a tlawh hnuah chief minister chuan, “Borah hian February 22-ah BJP a lo awm dawn a, kan state president Dilip Saikia-a’n a kimchang chu a buaipui dawn a. A rual hian Congress hruaitu thahnem takin Guwahati leh Lakhimpur-ah min zawm dawn a ni,” a ti.
Borah hi Congress campaign committee chairman niin Sarma-a nen hian an lo thawk dun tawh thin a, a rual velin Congress an zawm dun a, Sarma hian kum 2015 khan BJP-ah a kalsan a ni.
“Assam Congress party-a Hindu hruaitu awm chhun a ni tawh a, min rawn zawm hian BJP chu min tichak hle dawn a. Kan party-ah ani ang kan nei tur hi kan lawm a, kan national president, Nitin Nabin-a pawhin min zawm tur hi pawm tawhin a lo lawm em em a ni,” tiin Sarma-achuan a sawi.
Sarma-a hian Borah chu ‘a nihna ang ngeia zah leh chawimawinain’ an lo en dawn tih a sawi a, Congress hruaituin a zawm tur chu ‘ina haw’ ang a nih thu leh BJP chuan amah ang chu an paten hna leh chanvo sang tak an chelh loh ang chi an tam niin a sawi.
“BJP chu nun hniam leh khawsak sang lote tan mipui party a ni a, a chhungkaw tharah nuam takin a awm ngei ka ring,” a ti.
Borah hi Bihpuria assembly bialah a zawnin term hnih, kum 2006 leh 2016 inkar MLA a ni a. April vela an inthlan turah pawh a chuh ngei rin a ni.
Borah-a hi Assam Congress president-ah August, 2021 khan dah niin nikum May khan thlak a ni a, Lok Sabha MP, chief minister hlui, Tarun Gogoi-a fapa, Gaurav Gogoi-a’n a thlak.
An party-in an state-a eptu ni ve dang party-te thawhpuia sawma BJP paih thlak tuma bei nasa a ni a. Tun hnaiah committee khata Dhubri Lok Sabha MP Rakibul Hussain-a nena dah an ni chu a lungawi lo nia sawi a ni.
“Congress-ah hian kum 32 tel tawhin party tihnun leh mi dang thawhpuia BJP paih thla turin ka theihtawp ka chhuah a. Assam Pradesh Congress Committee (APCC)-a thawk zel turin harsatna ka nei lo va; mahse, APCC (R) tan chuan ka thawk thei lo,” tiin Thawhlehni khan Hussain-a hming lam si lovin a sawi.
Assam-a Congress hruaitute chuan Borah-a’n assembly inthlan hma lawka a chhuahsan chu an party thanna turah nghawng a neih dawn loh thu leh an rilru ang pu thawhpui siam zel an tum tih an sawi.
“Hruaitu hlun leh inpe, Borah angin party an chhuahsan a, chânna nasa tak a ni ngei a. Inthlan hma lawka min kalsan a ni hi a tha lo lehzual,” tiin Congress MLA pakhat chuan a sawi thung.