Mizoram Legislative Assembly 9-na thutkhawm vawi rukna chu Nilaini khan Assembly House-ah Assembly Speaker Lalbiakzama kaihhruaia chhunzawm a ni a, member hluite sunna hun hman a nih bakah zawhna leh chhanna hun hman a ni bawk.
Thawhlehni atanga tan budget session kal mek chhunzawmnaah hian minister hlui thi ta pahnih, minister hlui, ST Rualyapa leh MLA hlui, KL Rochama te sunna hun hman a ni.
House Leader Lalduhoma chuan an chanchin tlangpui tar langin member thenkhatin an chanchin leh an ui thu an sawi ve bawk.
Lalduhoma chuan ram hruaitu an sun tak pahnihte chu Mizoramin a ui a, ram leh hnam tana an inpekna leh hna an lo thawhnate a ngaihluin a chhuang takzet tih a sawi a, “Thlamuang takin chawl se, an kalsan tak an chhungten he hun harsa an tawh mek lai hian Pathian thlamuanna leh awmpuina kan dilpui a ni,” a ti.
Oppostion Leader Lalchhandama Ralte pawhin ram hruaitu hlui sun takte chu ‘chhim lam atanga arsi lian pahnih, an nunah Pathian tihna lang tlat’ tiin a sawi a, miten Politician te thu dik tawk lo sawi fo, rintlak lo anga an chhuah mek lai pawha an chenna veng leh kohhran kulpui, mite rin ngam, thu dik sawi thin, mi rethei hmangaihtu an tih pahnih an sun chu uiawm a tih thu sawiin, an kalsan tak an chhungten Pathian thlamuanna an chan a duhsak tih a sawi.
BJP MLA Dr K.Beichhua, Congress MLA Ngunlianchunga leh MNF MLA Dr R.Lalthanliana te pawhin uina thu an sawi a Speaker kaihhruaiin minute khat chhung ngawi renga dingin an sun a ni.
Assembly sesion ni hnihnaah hian zawhna leh chhanna hun hman a ni a. Social Welfare, Women & Child Development Minister Lalrinpuii chuan sorkar kum kal mekah Mizoram sorkarin Anganwadi Centre sakna tur sawrkar laipuia Ministry of Women & Child Development atangin Rs. vbc. 1.23 hmuh a nih thu a sawi.
West Tuipui bialtu MNF MLA, Prova Chakma-i zawhna chhangin minister hian anganwadi centre sakna tur hmuh a nih laiin a thawm thatna tur erawh hmuh a nih loh thu a sawi a, centre thar 41 sak a nih thu a sawi bawk.
Agriculture Minister PC Vanlalruata chuan kum 2025-a sawhthing leina chingpen nia sawi chungchang zawhna chhangin mi thenkhat pamham zualin an sawhthing tharchhuah hmun dang daiha mi man tlawm zawka lei khawmin secondary collection centre (SCC) kaltlangin anmahni tharchhuah anga hralh an lo tum thu a sawi a. Hriat chhuah hman a nih avangin sum release hma a hum hman a nih thu a sawi.