Aizawl: Congress Thalai chuan Nilaini khan Chawlhhmuna Chief Minister Lalduhoma in sak mek tlawhin an zirchiang a. Chief minister la ni rei lo ber hian Mizoram chief minister lo ni tawh zawng zawng hausakna a khum thuai dawn niin an ngai tih an sawi.
Thuchhuah an siamah kum 2021-a Serchhip by election-ah khan tuna pawisa engmah nei lom General Election-a leiba pawh la rul zo lo, dinhmun tha lo leh rethei, takin a insawi a. “Khatiang khawpa pawisa nei loa insawi khan chief minister atana lakluh a nih hma hauhin a chenna tur Babel in sang sakna turin tlang a rawt nghal a, thla khat chhung teh meuh zing 9 atanga zan dar 10 chhunga in hmun chhum lo chat lovin a lai zui leh nghal zat thei leh si hian Mizoram mipui mak tih leh rinhlelh a hlawh nasa hle,” an ti.
Lengpui ram hralh chungchanga a hralhna man an thlakhlelh thu a sawi leh ZPM sorkar hlima ram hralh tur hmanhmawh phelenga file an kaltir chuan chief minister in sak hi a in zawm ngeiah mipuiin an ngai a ni niin an sawi bawk.
Building hi ground floor tel lovin Mizo chhiara chhawng ruk tura duan a ni a, a pum puia 2,245 sq.m-a zau niin an sawi.
Insawi rethei si hian Lalduhoma hian Zonet Zoram Kalsiamin an kawmnaah a background thlirin mahni in sa ve thei tur niin a insawi lian leh hle si nia sawiin hausak thutna a awm ngeiah an ngai tih an sawi.
Lalduhoma hian tuna a in sak mek hi SBI hnuaia UNNATI Scheme hnuaiah nikum 2025-ah loan an lak thu a sawi a, hei hi mipuia inphatmarna leh mipui rilru bumna mai a ni tih an sawi.
UNNATI hnuaia subsidise dil hi mi 16 awm tawhin mi pathum approved tawh zingah Lalduhoma fapa hming a tel lo nia sawiin Lalduhoma’n bank-in an lo pe anga a sawi chu thil dik lo niin an sawi.
Chief minister Babel in sang sak mek leh Lengpui ram dik lo taka inlei hun a in nang chiah te, Council of Ministers meeting-in CBI chhui tura FIR an thehluh an tum thulh a nih leh dan te hian thil dik lo a awmzia an pawmah Congress Thalai chuan a ngai tih an sawi.