Aizawl: Directorate of Information & Public Relations buatsaih film tawi insiamsiakna, Mizoram Short Films Competition 2026 chu Nilaini atang khan endiktu atana ruat mi pangaten I&PR Mini Theatre, Lianchhiari Run-ah endik hna an thawk tan.
Film insiamsiakah hian film thehluh zat 41 awmin Mizo film insiamsiak awm tawha tel an la tam ber tum leh film theh luh pawh a la tam ber tum nia hriat a ni.
Ruahman dan chuan February 24 hian Mizoram Short Film Competition 2026-a ti thate hnenah lawmman sem a ni ang.
Directorate of Information & Public Relations chuan March 12 leh 13 hian Chapchar Kût 2026 pualin I&PR Mini Theatre, Lianchhiari Run-ah Mizo Film Show an buatsaih leh dawn bawk a, hetah hian intihsiaknaa tel short film eng emaw zat bakah Mizo feature film-te chhuah tum a ni.
Hei bakah hian Mizoramin lemchan lama hma a sawn zel theih nan leh film industry hmasawn nan Directorate of Information & Public Relations chuan Mizorama a vawi khatna atan March 16 – 18 hian ‘Lemchan-Mizoram Film Festival 2026’ a buatsaih dawn bawk.
Lemchan-Mizoram Film Festival atan hian IPRP&S Secretary Betsy Zothanpari Sailo kaihhruaina hnuaiah organizing committee din a ni a; Thawhlehni khan a vawi khatna atan Festival Director K Vanlalsangi, I&PR Director ni bawk kaihhruaina hnuaiah an thukhawm a, festival kalphung leh kalpui dan turte an rel a ni.