Jammu & Kashmir tlawha thang mek, Mizoram Journalists’ Association (MJA) member-te chuan nimin khan Jammu-a Pulwama khuaa Council of Scientific & Industrial Research (CSIR) hnuaia Indian Institute of Integrative Medicine (IIIM) Field Station an tlawh.
CSIR-IIIM an tlawhnaah MJA member-te hi Dr Shahid Rasool, Principal Scientist, CSIR-IIIM Jammu leh a thawhpui scientist-ten an lo dawngsawng a. Thlai hmanga damdawi leh rimtui siam chhuahna atana lavender, rose, sunflower, rosemary leh tulip an chinna hmunte an fanpui a, an thlai leh pangpar chin dan tlangpui an hrilhfiah a ni.
Hemi hnu hian Dr Rasool chuan CSIR-IIIM hmuna an hmalakna leh hnathawh dan hrang hrangte chu presentation hmangin a hrilhfiah a. Kashmir chu thlai leh pangpar hmunpui a an siam thu te leh chumi ni tur chuan theihtawp an chhuah chhunzawm zel thu a sawi a. An inkawmnaah hian zawhna leh chhanna hun an hmang ho bawk.
Press Information Bereau (PIB) ruahmana press tour-a kal MJA member-te hi Aizawl leh district hrang hrang atangin mi 13 an ni a. PIB, Aizawl head of office Rajeev Laurembam leh a thawhpui pakhat an kal bawk.