Milano Cortina 2026 Winter Olympics neih mek a ni a, khawvel hmun hrang hrang atanga infiammi fuan khawm chu dawhsan (podium) lawn kai thei nih tumin an inel mek a. Ram tihmingthatu nih tumin theih tawp an chhuah a, hetiang taka medal lak an tum hi a hlu viau em tih thlir ang.
Olympic medal hi mi tam tak chuan rangkachak hlang ni turah an ngai a, a ni lem lo a. Kum 1904-a Olympic an tan atang khan rangkachak chuan an siam thin ngei a, 1912 Olympic Games-ah khan an titawp ta a. An tihtawp chhan hi Indopui I-na hnuah khan rangkachak man a to tak em vang a ni.
A hnua gold medal chu silver gram 523 hmanga siam niin hetah hian rangkachak gram ruk vel bawr chu an telh ve thin a. En mai chuan rangkachak hlang a ang em em tho a, khawih pawhin a rit nalh mai a, a hlut hmel hle.
Pahnihnain an dawn thin, silver medal pawh silver atanga siam niin a tlangpuiin silver gram 525 a siam niin pathumnain an dawn bronze medal-ah chuan thir man to tak a tel ve lo a, dar hmangin an siam thin.
Kum 1904, 1908 leh 1912 Olympic gold medal kha chu rangkachak hlang a la nih avangin $1,00,000 velin a hralh theih ang a, hei hi tunlaia India pawisa chuan Rs. 90,58,470 vel a ni ang.
Tunah erawh 92.5% silver leh rangkachak gram ruk vel a nih tawh avangin gold medal hi $2,500 vel a ni tawh ang a, hei hi India pawisa chuan Rs. 2,20,000 vel a ni ang.
Gold medal-in a ken tel ropuina kha a tihlutu ber a ni a tih loh theih loh a, American tlan chak, Jesse Owens chuan Olympic gold medal pali a dawn zinga pakhat chu kum 2013 khan $ maktaduai 1.47 zetin a hralh a. American diver Greg Louganis pawhin 1984 Los Angeles Olympics gold medal chu a lilam a, $200,000 (Rs. 1,81,16,940)-in a hralh bawk a ni.
A thir hlutna atanga Olympic medal hlut dan hi teh chuan man to tak a ni dawn lo a. Medal dawng thei infiammi nun chu zan khat thil thu lekah nasa takin a inthlak danglam thei thung.