- Dr. C. Lalrampana
Kum 2017 lai vela Mizoram mipui titi ber chu Kolkatta khawpui New Town-a khatih laia Chief Minister Pu Lal Thanhawla’n In a sak chungchang kha a ni. Khatih lai khan Serchhip pa, Pu Hriata Chhangte, Kolkata a awm mek khan a Document-te haichhuakin Social Media-ah a tarlang a, chumi hnuah Nov. ni 11, 2017 khan ZNP thalaiin an President Pu Lalmuanpuia Punte hovin Press Conference kovin an umzui a, Nov. ni 11 , 2017 khan hemi thu kalzelah MNF thalai ten Session-na a CM kal tur dan tumin Police-te nen an innawr phah chiam bawk a nih kha!,
Social Media lama Pu Hriata Chhangte-in a rawn tarlan dan khan CM Hawla hian Kolkata Salt Lake-ah building sak mek a lo nei reng a. He a building sak mekna hi West Bengal sorkar Land Records-a a lan danin Plot No. AI-178, 3228 Sq. feet a zau niin a neitu pawh Shri Lal Thanhawla s/o Late H.P. Sailo, Zarkawt, Aizawl, tih leh ni 30 August, 2013 khan register a ni tih tarlan a ni a, hetihlai hian kum 2013 MLA Election dawna Pu Lal Thanhawla’n Serchhip bial candidate ni tura Election Commission of India (ECI) hmaa chhechham meuha affidavit a thehluhah he Kolkata-a a ram/inhmun hi a lo ziak tel lo tih chu sawiselna ber a ni.
Hetianga mahni thil neih (assets) thehluh kim loh emaw dik lova ziah, ‘False Affidavit’ hi The Representation of The People Act, 1951 Section 125 A-in a sawi ang chuan Chief Minister Pu Lal Thanhawla hian mipui leh sorkar a bum avangin leh ECI chuan MLA a nihna a\anga ban tir (disqualified) leh MLA chuh nawn theilo tur thlenga hrem/action lak theih a ni tih a ni.
Tichuan, Nov. ni 15 khan khan MPCC Media Department chuan Press Conference neiin “Kum 2011 April 13 khan West Bengal sorkar chuan W. Bengal Housing Infrastructure Development Corporation Chairman quota-in India mi langsar zualte hnenah Kolkata khaw pawn Satellite Township New Town-ah inhmun engemawzat a sem a, Pu Hawla pawh telin kum 2013 khan tihfel ni a, August 30, 2013 khan West Bengal HIDCO nen Deed of Agreement siamin, Pu Hawla hian Tax neuh neuh leh chawi tur cheng nuai 17, sing 6, sang 1 leh 760 a pek hnuin New Town ram ruak pakhat chu a hmingin a awm ta a ni. Hemi hnu hian Pu Hawla hian a nihna tak tak a la nei thei lova, New Town Kolkata Development Authority hnuaiah inziahfel a ngai a, A neitu nihna tak hi kum 2013 Mizoram Assembly inthlan zawh fel vek hnu July 25, 2014-ah tihfel a ni chauh a, kum 2013 Assembly inthlan dawna affidavit siamah khan Pu Lal Thanhawla khan New Town-ah hian inhmun nei angin lo insawi se, dawt a sawi a ni zawk dawn a, ECI-a Chief Minister Pu Hawla hekna kha dan hnuaiah thutling lo a nih avangin Pu Hriata Chhangte pawh khan Court-ah a hneh ta lo ni khan a lang a ni.
Ni 18.2.2026 (Nilaini) khan Congress Thalai chuan Chawlhhmuna Chief Minister Lalduhoma insak a hmunah tlawhin an zirchiang a. Chief Minister la ni rei lo ber Lalduhoma hian Mizoram Chief Minister lo ni tawh zawng zawng hausakna a khum thuai dawn niin MPYCC chuan a ngai bawk.
Thuchhuah an siamah kum 2021-a Serchhip By Election-ah khan tuna CM hian, “Kei hi pawisa engmah ka nei lo. Bye-election hi ka tan a huphurhawm lutuk, General Election-a ka leiba pawh ka la rul zo lo,” tiin dinhmun tha lo leh rethei, khawngaih thlak takin a insawi a. Khatiang khawpa pawisa nei lova insawi khan Chief Minister atana lakluh Swearing-in a nih hma hauhin a chenna tur Babel in sang sakna turin tlang a rawt nghal a, thla khat chhung teh meuh zing 9 atanga zan dar 10 chhunga in hmun chhum lo chat lovin a lai zui leh nghal zat thei leh si hian Mizoram mipui mak tih leh rinhlelh a hlawh nasa hle a. Lengpui ram hralh chungchanga a hralhna man an thlakhlelh thu a sawi leh ZPM sorkar hlima ram hralh tur hmanhmawh phelenga file an kaltir khan Chief Minister in sak hi a in zawm ngeiah mipuiin an ngai a ni.
He Building Drawing hi Hrangthanga Zote (R. No A/AMC/2011/13) niin, a neitu hi Ruata s/o Lalduhoma a ni. Building hi Ground Floor tel lovin Mizo chhiara chhawng 6 tura duan a ni a. Ground floor hi 66 m2, 1st Floor 150 m2, 2nd 226 m2, 3rd Floor 352 m2, 4th floor 443 m2, 5th floor 504 m2 leh 6th Floor 504 m2 niin building pumpui zau zawng (area) hi 2245 sq.m teh meuh a tling a ni.
Serchhip By Election-a khatiang taka insawi rethei si khan Lalduhoma hian Zonet Zoram Kalsiam in an kawmnaah, Chief Minister P.A ah kum 6, IPS, MP, MLA ah vawi nga (5) a tlin tawh thu leh a Background thlirin mahni in chu sa ve hle thei tur niin a insawi lian leh hle si hi hausak thutna a awm ngeiah Congress thalai chuan a ngai a ni.
Lalduhoma hian tuna a in sak mek hi SBI hnuaia UNNATI Scheme hnuaiah nikum 2025-ah loan an lak thu a sawi a. Mahse hei hi mipuia in phatmarna leh mipui rilru bumna mai a ni. UNNATI hnuaiah Hotel, Home Stay, Restaurant, Hospital, Industry din nan te industry tihlenna atan te (plant and machinery atan bik) a loan la ten an loan lak zatve an claim let leh theihna scheme a ni a. Mi pakhatin Crore 250 thleng an la theiin UNNATI hnuaia subsidise dil hi mi 16 awm tawhin mi 3 approved tawh zingah Lalduhoma fapa hming a tel loiin dilna 4 hnawl a ni a, dilna lut thar a awm bawk. Lalduhoma’n Bank in an lo pe anga a sawi hi thil dik lo let tawp a ni. Heng an din dawn a nih pawhin endik thlap niin sak zawh hnuah pawisa hi pek chhuah chauh a ni thin. Lalduhoma’n awlsam tak anga sawia thalaite pawh ti ve tura a sawi hmuh hi thil ngaihthlak nuam tak niin lang nimahse mi bik tan lo chuan tih ve mai mai theih a ni lo, hei pawh hi thiam chan tuma insawi mamna maiah Congress thalai chuan a ngai a ni.
Chief Minister Babel in sang sak mek leh Lengpui ram dik lo taka inlei hun a in nang chiah te, Council of Ministers meeting in CBI chhui tura FIR an thehluh an tum thulh a nih leh dan te hian thil dik lo a awm zia an pawmah Congress Thalai chuan a ngai a. ZPM Chief Minister Lalduhoma hian an sorkar hma khan portfolio a neih ve dawn loh thu a sawi a, mahse Chief Minister a nih rualin portfolio tha tha a chang a. Kalphung thar chu mipui sum mahni tana inhaivurna a ni tih a ti chiang a. Tunhnaia hetianga a hausa thar ta thut hi a mak lova, pawi khawihnaah Congress Thalai chuan a ngai a ni.” tiin an puh mek niin a lang.
Congress thalaite hian thudik an hre chiang hle niin a lang a, an puhna hi a dik tak tak a nih chuan Pu Hriata’n an Pu hlui Pu Hawla a khing ngam ang khian CBI emaw, Mizoram Lokayukta-ah emaw, CM Pu Duha case hi chhuitir ve mai zawk se thudik tak chu a lang chiang ber ang.
Kan Zoram political Party-te inbeih dan hi a changkang lovin a ninawm takzet ta e. CM hnuhung apiangte in sak inensiak competition nei thin law law se a tha zawk mai ang em tih hi zawhna pawimawh tak a ni ta e. Mizoramah hian thu inchuh, mipuiin a dik zawk an hriat hleihtheih loh te, a hmawrbawkna awm mumal lova zu zi ta mai mai te, a tawpa sirtlukpui tak maite a tam thin hle. Politician-ho dâwta an inchirhthehna karah mipuiin thudik hre hlei thei lova kan awm fo ta mai hi a kristian lovin a zahthlak takzet thin a ni.