- K. Hmingthankaia
Pu Lalduhawma ngaisang lutuk leh duhsak em emtuten social media lamah, miin phal tak leh fair takin Pu Lalduhawma cheng vaibelchhe10 leh rangkachak pawh engemaw zat an pe niawma an sawi hi ka lo hmu ve zeuhva, ‘Aw, hei hi tak tak han ni hlauh se ka va ti tak em. Kan Pathianthu dik zia leh, kan Pathian chu Pathian rinawm leh a thutiama ding nghet tlat a nih zia chu Pu Lalduhawma chungah pawh a rawn lantir leh ta a nih hi. Kan Pathian Nung, Pathian Awm ngeia chuan A lama rilru dik tak putute chunga a chak zia tihlan nan leh malsawm a duh avanga khawvel hmuntina a mit a len ruai ruai thin zia chu a tak ngeiin Pu Lalduhawma leh a kaihhruai sawrkar chungah pawh a rawn thlen diktir leh ta a nih hi. ‘Pathian chu fakin awm rawh se’ tiin, nasa takin ka hlim hle ang, ka lo ti a ni.
He thu ka hmuh ruala, tak tak nise chu, tia ka rilrua thil lo awm chu sawifiah vek thiam pawh a ni lova. Engpawh nise, kan Pathian hi a awm ngeia, a thutiamah hian a la ding nghet tlat reng a ni tih hi ka rilrua lo chiang hmasa ber chu a ni. Kan ka chauh ni lova, kan thinlung zawng zawnga Pathian kan tiha, Pathian kan dah hmasak ber zel phawt chuan engkim pek min tiamtu, ‘Keimaha in awm renga, kei pawh nangmahnia ka awm reng chuan engpawh dil rawh u, pekin in awm zel ang’ titu hi a la pangngai reng a ni tih hi a chiang hlein ka hria a ni.
Tin, Abrahama leh Sari-te pawh kum tam tak hnu, an tar lamah Pathianin mal a sawm nasat hle thu kha ka rilruah chuan a lo awm bawk a ni.
Pu Lalduhawma hian a ram Mizoram leh a hnampui Mizote hi kawng dik leh hun nuam zawk min zawhpui tum hian kum tam tak a lo vakvai tawha. Dinhmun duhawm leh pawimawh tak tak a lo chan phah tawh bawk a ni. A rilru ang pumi a dap kual ruai ruaia, a milpui tur mihring a zawng kual nasa rei hle a ni. Chutih rualin keini lah kan rilru a lo kalsual thui tawh hlawm bawk si nen, ram siamtha tur khawp thawhpui tur leh zuitu tur a hmu zo leh thin silo. He kan ram, Mizoram leh Mizote tan hian kum tam a lo vakvai tawha, thu tam tak a lo aupui tawha, mahse, tumahin kan tih puitlinpui duh chuang si lova, ‘ Pu Lalduhawma chu ram hruaitu, Chief Minister atan ka duh ber’ ti chung zel reng siin, keimahni hlawk theihna tur tawite leh, keimahni hmasial leh duham vangin kan laltir ngam leh thin silo a nih kha.
Ani lahin tlawmsan mai duh bik lovin, hmuhsit leh nuihzat, deusawh leh tih hrehawmna karah pawh tluksan mai duh lovin, harsa tak leh chau tak chung pawhin, rethei takin a tum ram chu thlen talh tumin a bei tang tang zel tho a nih kha.
A tawp a tawpah, a kum leh a neih sum pawhin a tlin tawh loh lamah, a chauh tawh hle hnu leh, amah pawh a beidawn rum rum tawh hnu, ” Tun bak chu ka ti tawh lovang, ka tawp tawh ang, ka chawl tawh ang, a zahthlakin a hreawm zozai ta e” a’n tih meuh chuan, tlai ngailo kan Pathian chu a rawn che ta rap maia, a hun takah a rawn chawikang ve ta a nih hi. Pu Lalduhawma hian a vahvaih chhung zawng khan Pathian a hre renga, Pathian pawhin a hre reng a ni tih hi, Mizoram mipuiten kan hmelhriat tirh atanga a awmdan, a thil tih leh a thil tawn zawng zawng atang hian a lang chiang hlein ka hre thin. Pathianin hun a tih hunah chuan a rilu milpui tur leh amah zuitu tur leh thawhpui tur chu a mite a pe ta mai a nih hi.Tuna zui ve duh hrih lo leh thawhpui ve duh hrih lote, lo do ngat ngattute leh, lo bei ngar ngara, tih chhiat lo tum ngat ngattute pawh hi, hetianga awm tur renga Pathianin a ruatte tho an nih hi. Pathianin tul a tih hunah chuan amah pawh hi a la chawlhtir ve leh mai anga, a thurualpui leh a zuitute pawh hi a la ti danglam leh thei tho bawk a ni.
Mi tam tak chuan he khawvela an damchhung hian kawng eng eng emawah leh politic-ahte hian hlawhtling viau niin inhre thin bawk mah se, an hming thatnate, an zahawmnate, an rinawmnate, miten an thinlung taka an ngaihsanna leh an zahnate, an mihring hlutna zawng zawngte hloh vek khawpa tih atin an lo awm leh thin sia. Chu’ng mite chu an damchhung leh an thih hnu pawhin miten sawi sawi kher lo mah sela, anmahni ngaihtuah chhuah apianga hriat tur emaw, a ziak chhiar tur emaw ser dum reh thei tawhlo hnutchhiaha mual liam ta an lo tam tawh a ni. Chu’ng mite chu an damlai pawhin miten an hmaichhanah tilang lo mah sela, an thinlungah enge maw a awm tlat tawh thin a ni. Chu’ng mite chuan an hlutna dik tak an hloh tawh avangin an tan dam man a awm tawhlo bik thin a ni.
Pu Lalduhawma hi chu a vannei hle maia, tuna a nihna hi mak tak maia a hloh a nih ngawt loh chuan, a damchhung hi zahawm takin a hmang liam dawn niin a lang. A hun hnuhnung lamah nasa takin Pathianin a chawimawi tlat mai a. Pathian lamah chuan a tawp khar that hi a pawimawh si a.
Kan Pathianin a duh chu a tihlen mai tur thu leh, a duh chu a tih hniam mai tur thu min hrilh angin, a duh zawng mihring chu tihlen dan, chawisan dan, chawimawi dan leh mal sawm dan kawng hi kan Pathian chuan a hre em em a ni. Chuvangin, tuna pawisa tam tak leh thil hlu tam tak miin phal tak leh fair taka Pu Lalduhawma an pe nia amah ngaisang leh duhsaktuten an sawi thawi pawh hi, tak tak a lo nih hlauh chuan, kei chuan Pathian remruat, Pathian hnathawh ropui lutuk rawn lanchhuahnaah ka ngai thlap ang. Tin, hetiang rawn sawi chhuaktute pawh hi Pathianin a thil tih ropui tak puangzar tura a ruatte an ni-ah ka ngai hmiah bawk ang. Anni’n rawn puangzar hlauh lo se chuan keini ang chuan kan lo hre ve dawn si lova, Pathian kan fak thei dawn lo a lo ni.
Hetianga Pu Lalduhawma leh a thil dawn rawn sawitute rilruah hi chuan, Pu Lalduhawma leh a sawrkar tih mualpho leh tih chhiat tum vanga rawn sawi pawh an lo ni maithei, mahse, an rin loh lam zawnga Pathian hna thawh theih zia tih lanna a lo ni leh daih mai a ni.
Tin, he thil, pawisa tam tak leh thil hlu engemaw zat miin Pu Lalduhawma an pe nia an sawi hi tak tak pawh lo nise, enge Pu Lalduhawma leh a sawrkar tan mualphona tur leh, enge tihsual an neihna tur ni reng reng anga? A petuten an phal phawt chuan an duh duh mihring, an duh zah zah an pe ang chu. An pawisa, an ta, an kuta awm alawm. An pawisa pek chu khawi atang pawha an neih a ni ang chu, an phala an pe a ni mai alawm. Kohhranah pawh thawhlawm tam tak tak petute pek hi kan buaipui ngai em ni?
A thuhrimah, sawrkarin mimal ram hrang hrang, chhan hrang hrang avangin vawi tam a lo hmansak tawh thina, componsation tam tak tak a lo pe tawh thina, chu’ng chu dan diklo tiin kan sawisel luih luih ngai kher em ni. An ram neih dante kan chhui kan chhuiin kan kher kan kher ngai kher em ni? Lengpui ram a nih tak avanga sawrkar leh a ram neituten thil diklo tia puhna tur ngawt kan zawn luih tlatna chhan hi engdang vang ni lovin, kan sual vang leh midang leh sawrkar lai ZPM kan itsik lutuk vang chauh a ni tih hi a va chiang si ve. Sawrkar hian Sihphir ram pawh a laksaka, engatinge Lengpui ram chauh kan sawia Sihphir ram kan sawi ve leh duh miah si loh? Sihphir ram neitute hian an ram man hi tute emaw pe ve ta se kan sawi luih luih duh tho ang em? Kan lo sawibuai lui ve talh ngam tho ang em? Sihphir ram leina pawisa chu a tak a ni a, Lengoui ram leina pawisa chu pawisa lem a ni bik em ni?Lengpui ram kan sawi kawi buai luih vel chhan hi chu mipui bum tumna mai a ni e.
Engpawh nise, Pathian thil tum leh Pathian hnathawh hi chu dan tak tak theih a ni lova. Pathian duh zawnga awm thinte, Pathian an lama a tan tlatna mihringte hi chu tih chhiat hleitheih an ni tak tak ngai chuanglo a ni.
Ka eiru ve lovang, tih thu Pathian leh mihring hmaa tawngka ngeia tiamtute hi, Pathian zah chung zela in thutiama in din tlata, engkima Pathian rawn chung zela thil in tih phawt chuan in tan malsawmna hrang hrang a lo awm zel mai dawn a ni. ZPM party pawh Pathian ruat ang ngeia lo piang a nih anga party mi leh sa leh party hruaitute zawng zawng pawh, Pathian duhzawng ngaihtuah tlat chunga in awm zel phawt chuan, engvangin nge Pathianin mal a sawm loh tehlul ang che u ni. Pathian tih bawk, Pathian ruat ngeia rulling party nih bawk man hi chu in tel ve ngei ngei tur a ni ringawt.
Pu Lalduhawma leh a sawrkar, a kaihhruai, a thawhpui zawng zawngte pawh Pathian ruat ngei, Pathianin in awmna tur dik taka a dah che u in nih avangin zam reng reng suh u. Thinlung taka Pathian in tih chhung chuan in beisei loh lam atangtein mal a rawn sawm zel mai ang che u.
Pu Lalduhawma pawh tuna miin thil an pe che nia an sawi hi tak tak a lo nih hlauh chuan, Pathian remruat ngei a ni tih pawmin lawm taka la tur leh, thlamuang taka awm turin ka duhsak a che. Tin, tuna mi hi tak tak a lo nilo ta a nih pawhin, hriat lawk loh malsawmna dang tam tak chu khawi khawi emaw atangin a lo kal zel tho ang.
Ama remruat ngeia Chief Minister-a hungtu che kan Pathian hian engvangin nge a thlauhthlak tehlul ang che ni. Engvangin nge i retheih reng bik ang le? Engvangin nge hmuhsit leh nuihzat i nih reng bik ang le? A lama rilru dik tak i put chhung chuan kawng hrang hrangin Pathianin a la chawimawi zel ang che.
MLA, Minister leh Chief Minister meuh ni ve bawk hlawm ta rengruang chung si a, mahse, eiruk tum ve bawk silo ta na na na chu engvangin nge kawng hrang hrangin Pathian malsawmna in dawn loh tehlul ang ni. Pathian ruat ngei party, Pathian ruat ngei MLA leh Minister-te chu engvangin nge an retheih reng bik ang? Pathian ruat ngei Chief Minister ngat phei chu a rethei tur a ni lo lehzual.
ZPM party leh ZPM sawrkar hi Pathian ruat ngei in nih angin, Pathian lama rilru dik tak pu chung zelin hlaulo leh zamloin kal zel phawt mai teh u. Mahse, thil tha lam reng reng dotu leh tihchhiat zel tumtu Setana hi chu khawvel awm chhung chu a awm zel dawna, hmanrua pawh a ngah a nia aw. Fimkhur ang che u.