Aizawl : BJP Mizoram chuan Inrinni khan an party pisa-ah Prashikshan Abhiyan training an buatsaih a, he hunah hian BJP National Spokesperson Guru Prakash Paswan chuan zirtirna a pe.
Guru Prakash Paswan chuan Prime Minister Narendra Modi sorkar hian India ram chu Global AI Hub-ah siam a tum mek a, hemi zulzui hian BJP kalphung pawh siam rem ve zel tum a ni a, a tam thei ang ber digital hmanga BJP inkaihhruaina pawh kalpui tum a nih thu a sawi a. “Khawvel hmasawnna kal zelah IT lam thiamna a pawimawh chho zel dawn a, chutiang chiah chuan BJP mi leh sa te chu IT lama thiamna kan neih theuh a tul,” tiin, Deendayal Upadhyaya Prashikshan Abhiyan buatsaih chhan a sawi.
BJP chuan chhungkua duhsak bik a nei lo va, India ram pum hi chhungkua angin a en zawk avangin hnam tin dinhmun chawisan a tum lian hle tih sawiin Guru Prakash Paswan chuan, “BJP kalphungah hian khawtlang tana inpekna leh intluktlanna kalpui a ni a, Prime Minister Modi ngei pawhin mi ke a sil sak a, mi rethei berte pawh hmuh hniamna nei lovin inpawh takin an kalpui a ni,” a ti bawk.
BJP Mizoram General Secretary Lalfakzuala Hauzel kaihhruai inkhawmah hian BJP Mizoram President Dr K Beichhua, MLA pawhin thu a sawi.