Pathianni zing khan Las Vegas khawpuia T-Mobile Arena-ah Boxing-a WBC welterweight kawnghren inchuhna inhnek ngaihven hlawh tak a awm a. Inhnek hmuhnawm takah Ryan Garcia chuan champion lai Mario Barrios a hneh a, WBC welterweight champion thar a ni.
Lightweight-a champion lailawk lo ni tawh Garcia hian welterweight a champion lai Barrios lakah bul a tan tha viau a, round khatna tir lam second 30-na lekah a khingpui a hnek tlu nghal. Bul a tan that em vangin inrintawkna sang zawk nen a inlan chhunzawm a, round 12 an khelh zawh thlengin chak phu zawk a ni tluanchhuak zak.
Hmuhnawm taka round 12 an inhnek zawh hnuin endiktu pathumte chuan Garcia an chaktir vek a, point 119-108, 120-107 leh 118-109 a hnehna changin Barrios kawnghren kawl lai a chhuahsak a, World Champion a ni ve ta nge nge.
WBC welterweight champion thar Garcia hi Drugs test a pal tlang zawh loh vangin kum khat chhung hrem a ni. Hrem a nih hnua a khingpui hmasa ber Rolando Romero chu mak tak maiin a hneh lo. Romero laka a tlawm hnua inhnek a hmachhawn leh hmasak berah phu takin hnehna a chang a, World champion a ni ta hial nghe nghe a ni.
Barrios hneha champion thar a nih hnuin Garcia hian a hmuna an inhnek en vetu WBO super-lightweight champion Shakur Stevenson hming a lam a, kawnghren an kawl lai ve ve thapa inhnekpuiah a cho. Stevenson pawhin Garcia chona chhang letin, “Champion ropui nih ka duh a, champion ropui ni turin hlauh ka nei therte lo.” a lo ti ve bawk. Garcia leh Stevenson te hi an inhmachhawn thei a nih chuan inhnek hmuhnawm leh ngaihven hlawh tak a nih ngei a rinawm.