Manipur Thanlon constituency atanga tum thum lai MLA atana thlan tlin tawh Vungzagin Valte chu February ni 21, 2026 tlai dar 5:30 khan Medanta Medicity Hospital, New Delhi-ah a thi. A ruang hi Pathianni khan Lengpui Airport thlenpui a nih hnuah, Manipur Lamka panpui a ni.
May ni 4, 2023 khan Manipur-a Kuki-Zo leh Meitei inkara buaina chhuah hlimchhawn khan BJP MLA Vungzagin Valte hi Imphal-ah, khatih laia Chief Minister N Biren Singh nen meeting an nei zo a haw lam chu kawng lakah mipui thinrimin an lo bei a. He inbeihnaah hian Vungzagin hian a lu-ah leh taksa hmun hrang hrangah hliam na tak a tuarin, sorkarin air ambulance a buatsaih hmangin Delhi lama enkawl tura phurh thlak nghal a ni a, nikhaw hre lovin awmin Apollo Hospital-ah hun rei tak chhung enkawl a ni a, a harhchhuah hnu-ah tawng lamah harsatna a tawh bakah, a taksa a tiche tha thei lo a, wheelchair-a nawr ngaiin a awm a ni.
April 2025 khan a dinhmun a tha chho deuh nia hriat a nih avangin Churachandpur-a an chennaah hawpui a ni a. Taksa bawrhsawm takin a awm zui reng a, a dinhmun a hniam leh avangin February ni 8, 2026 khan Medanta – The Medicity Hospital, New Delhi-ah enkawl chhunzawm turin phurh thlak leh ni mah se, a natna tuar lovin Inrinni tlai lam khan chatuan ram a pan ta a ni.
YMA, Manipur Group chuan an sunin pawi an ti takzet tih thuchhuah an siam nghal a, “Pu Valte hian a thawhrimna leh a taimakna, mipui leh tribal tana a inpekna hi kan chhuangin hun harsaah pawh tribal te dikna tan tlattu a nih hi kan chhuang takzet a ni. A kalsan tak chhungkhat laina zawng zawngte Pathianin vengin hualhim zel rawh se tih chu kan tawngtaina a ni,” an ti.