Sports Minister Lalnghinglova Hmar-in Aizawl West Jt. YMA Field-a phullem phah tur a enfiah a, sorkar hotute leh khawtlang hruaitute nen hmalak dan tur an sawi ho.
SASCI atanga Rs vbc 10 hmangin Aizawl West Jt. YMA Field-ah hian artificial turf phah tur a ni a. Inrinni zinga hmalak dan tur a enfiahnaah hian Aizawl West II bialtu MLA ni bawk. Lalnghinglova Hmar chuan Aizawl West Jt. YMA-ten an muala phullem phah an dil chu an dil laia pawisa a awm loh avanga tihsak nghal thei lo mah se, sorkarin hnathawhna tur sum a pek atanga phah theih tur a ni chu lawmawm a tih thu a sawi.
Sports Minister chuan artificial turf phah bakah sum awmdan azirin thil dang eng nge an tih telh theih tihte, an hawilam tur tichiang turin khawtlang hruaitu leh Jt. YMA nen sawiho a duh avanga a hmuna tlawh a nih thu a sawi a. Mizorama infiamna chawikan nan hman a nih theih nan leh sports association-te pawh duhsak turin YMA hotute nen an sawiho tawh thu a sawi bawk.
Hmalakna tur an sawiho zingah hian Jt. YMA lamin an ngaihpawimawh, field-a tui lut lo tura ven dan tur te, tui paihna mumal tak siamna tur zirchian a, a hmunhmain a mil anga hnathawh te, gallery mumal tak a chung neia siam leh zana training neih theihna tur tawka light tha vuah te a tel a. Sorkar, khawtlang hruaitu leh Jt. YMA te inrawna hmalak ho zel nise tiin an rel bawk.
Sports Minister in Jt YMA Field a tlawhnaah hian Mizoram State Sports Council Secretary Henry C. Lalrawnkima leh MSSC officer-te, Vaivakawn Local Council, Jt. YMA hruaitute leh khawtlang hruaitute an tel a ni.