Aizawl : Central YMA General Secretary Prof Malsawmliana’n Lengpui Model Branch YMA-in YMA Kumpuan Ruihhlo Do hawnna hun an buatsaih hmanpuiin, Zirtawpni zan khan Kumpuan a hawng.
Kumpuan hawngtu Central YMA General Secretary Prof Malsawmliana chuan, mahni hnampui ngei nupui pasal neih chu hnam himna a nih thu a sawi a. Mizo hnam hmakhua an thlir a ngai tih sawiin, “Mizo hi hnam tlemte, uihum zah lek kan ni. Hnam dang kan neih hian kan fate hnam dang an nih nghal zel avangin Mizo tlem tawh tlem leh zualna a ni a, nu leh paten kan fate nupui pasal zawn kawngah kan fimkhur a ngai a, hnam rilru kan put a ngai a ni,” a ti.
Prof Malsawmliana chuan YMA hi khawtlang hmachhuan a ni tih sawiin, YMA hi a chak loh a, a lo chauh chuan kan khawtlang nun a tichau a, khawtlangah sualna pawh a lo pung thin a. Ruihhlo do kawngah YMA-in hma a lak loh chuan hma la tur an awm loh avangin, YMA hi tihchak a ngai a, YMA hruaitu pawhin an mawhphurhna an hriat chian a ngai lehzual tih a sawi.
Central YMA General Secretary chuan ruihhloin ram a nawk nasat zia te, ruihhlo avanga mitthi mai ni lo, chhungkaw tam takin harsatna an tawh avangin YMA chu pen chhuak lehin, YMA hian ruihhlo do kum an puang ta a, indo an puang dawn a. Chu indonaa tel tur leh ruihhlo lakah tlawm mai lo turin kalkhawmte a sawm.
Kumpuan hawnnaah hian khawtlang nu leh pa thahnem tak telin, Tual Upa Lalrohlua chuan ruihhlo do nan Lengpui Branch YMA hnenah Rs. 3,000 a hlan bawk.