ZONET TV Pvt Ltd-in Mizoram Journalists’ Association (MJA) thawhpuia Miss Mizoram 2026 thlanna a buatsaih turah college thenkhatin an aiawh tur miss an tifel tawh.
Miss Mizoram 2026 thlanna neih turah hian Aizawl khawpui chhunga college hrang hrangin college miss atana an thlante chu Miss Mizoramah hian direct entry pek an ni dawn a; Audition-ah inlan a ngai dawn lo va, eligibility criteria an tlin ve erawh a ngai thung.
Tun dinhmunah Miss Mizoram 2026 intihsiaknaa tel tur hian college panga — Govt. Hrangbana College, Aizawl West College, Pachhunga University College, Govt Zirtiri Residential Science College leh Govt T Romana College-te chuan an miss tel turin an tifel tawh.
College Miss te bakah hian, district tinah District Miss thlan leh tum a ni a, District Miss te chu Miss Mizoram final contest-ah an tling nghal dawn.
Open Audition hi Aizawl district-a mite tan March 4, 2026-ah neih tum a ni a, Open Audition-ah hian Aizawl district mite chauh ni lo vin, district danga mite tan pawh tel theih a ni.
Open Audition-a inlan tur zingah pawh, Fashion show ngaihhlut leh lara lo inlan tawh model tel tur an awm bawk.
Ruahman lawk dan chuan, Miss Mizoram 2026 Grand Finale hi April ni 24, 2026 khian R Dengthuama Hall-ah neih tur a ni.