Inrinni zan khan Qatar Open final khelh a ni a, mipa lamah awlsam takin Carlos Alcaraz a champion.
Champion tura rinkai ber Alcaraz hian final-ah a khel tha hle a, a khingpui Arthur Fils lakah minute 50 chhung lekin hnehna a chang hman. Fils lakah hian tha takin bul a tan a, set khatnaah game hnih chiah hloh chungin set a la.
Set khatna a la hnuin a khel tha chhunzawm viau a, set hnihnaah tha zual zawkin a inlan a, game khat chauh hloh chungin zet a la zui leh. Jannik Sinner hnehtu Jacub Mensik paltlanga final lut Fils lakah hian minute 50 chhung lekin 6-2, 6-1 in hnehna a chang a, phu takin a champion.
Minute 50 chhung leka champion hman Alcaraz hian Qatar final-a chak rang ber record a siam. Kum 2025 khan Qatar Open-ah hian Casper Ruud chu minute 63 chhung leka champion in, Qatar Open final-ah chak awlsam ber record a siam a. 2025 a quarter-final paltlang zo lo Alcaraz-a’n Ruud record hi a rawn thaichhe zui ta a ni.
World No. 1 Carlos Alcaraz hi kum 2026-ah a khel tha tluang viau a, inelna pangngaiah tlawm a la nei lo. A vawi khat nan Australian Open-ah a champion a, Career Grand Slam puitlin thei naupang ber a nih hnuin Qatar Open-ah a champion zui leh bawk a. World No. 1 a nihna a sawh nghet deuh deuh zel.