Aizawl : Thenzawl Vengthar naupang pathum chu Inrinni khan Society dilah an tlahlum, Pathianni khan vui liam an ni.
Society dila tla hlum naupangte hi H. Lalhriatluanga (9) s/o H. Laldawngkima; Lalmuansanga (9) s/o Lalthangpuia (L) leh C Lalbiakhluna (7) s/o Lalfakzuala te an ni.
An ruang hi Inrinni zanah Thenzawl Vengthar Bengkhuaia Hall-ah lumen an ni a, Pathianni chhun dar 12-ah an vui a ni.
Naupang pathum te hi Inrinni tukthuan ei kham atanga an thianho hian an inkawm a, zanriah ei hunah pawh an la haw loh avangin an chhhung ten an zawng a, dilah tuicheng tura an kal thu an thian kawm pakhat hnen atanga an hriat atangin mitlawmngai ten an kalna nia rin khua atanga hnaite, Cooperative Society, Society Dil tia sawi thin hi an pan nghal a. Dil ko tlangah an chapal hmuh a ni a, dil chhung dap a nih hnuah an ruang tlai dar 5:30 leh dar 6 inkarah hmuh a ni ta a ni.