Aizawl : Mizoram State Planning Board Vice Chairman Dr Kenneth Chawngliana eptu party te’n sorkar ve an duh a nih chuan mipui tan policy te zuarin chief minister tur te pawh zuar ngam turin a chah.
ZPM party-in Thawhtannia an party pisa-a chhung inkhawma thusawitu, Dr. Kenneth Chawngliana chuan, Mizoram lo kaihruai tawhtuten an zir loh avangin hmana an neih tawh tur an la nei thei lo va, tunah hian Lalduhoma kaihruaina hnuaiah bul an tan thar chauh ang a ni a. He sorkar hian kawng dik a zawh mek a, tuna an hmalakna chin chauh atanga chhut pawhin mipuiten sorkar tha a nihzia an hre mek tih a sawi.
Dr Kenneth Chawngliana chuan kum hnih chhung hian eiru ve duh chu ni se eiruk tur a tam tawh lutuk a, heti chung hian tumah hming hliau awm lo va, an minister-te kut a fai thiau mai hi fakawm a tih thu sawiin, “Kalphung thar mipui sorkar hi Mizoram tan a thlamuanthlak a, opposition party-te hian sorkar ve an duh a nih chuan mipui tan policy-te zuarin Chief Minister tur te pawh zuar ngam ve rawh se,” a ti.
Independence ram an nih atangin kum 79 an hmang tawh a, hemi chhung hian Congress chu kum 54 an sorkar tawh tih sawiin Dr. Kenneth Chawngliana chuan, “Heti khawpa sorkarna chang rei tawh ni mah se ram tan thil ropui tak hnutchhiah an nei mang lo,” a ti a. Lok Sabha inthlanpui lo awm leh pawh ni se, a hma aiin Congress hi an tlak hniam zel a ring tih a sawi a. Tunah phei chuan hmarchhakah Congress sorkarna a awm tawh lo va, Mizoramah pawh inthlanpui an neih hnuhnung berah chuan seat khat chauh an chang pha tawh tih a sawi.
Mizoramah ZPM an sorkar ta a, kalphung thar sorkar hnuaiah Prime Minister Narendra Modi-an India tha tak leh chak taka a kaihruai ang maiin Lalduhoma kaihruai sorkar hnuaiah kum hnih chhung lekin hmel thar an hmu a, hetiang zela an kal chho a nih chuan India ram state danga party thenkhatten term tam tak sorkarna an chelh angin ZPM pawhin Mizoramah sorkarna an chelh ngei dawn tih a sawi bawk.