Mizo Zirlai Pawl (MZP) chuan kartawp khan khawpui chhung hmun hrang hrangah dan lova kan ramchhunga awm hnamdangte endikin, phalna nei lo thahnem tak an man a, thuneitute hnena an hlan thu an sawi.
Kan inhungbingna Inner Line Permit (ILP) hi kan vawnhim sauh sauh a tul a, a pawimawhzia kan hriat telh telh hi a tul hle.
Hnam tlem kan ni a, India vai ho tamzia hi kan hriatreng a tul a, hnam tam tak an lo chimral tawh dan pawh kan hriat thar a tul. Chutiang hnam raltate ang chu kan chungah pawh a thleng ve thei reng tih kan hriatreng a va tha em.
Sorkar tan inthlahdah chi a ni lo a, he kan dan neih tha tak hi kan humhim a, kan kenkawh khauh lehzual sauh sauh pawh a tul hle.
Relin kan kawt maiah min rawn luhchhuah tawh lehnghal a, kan fimkhur lehzual pawh a tul viau. Heng ILP nei lote dap leh umzui kawngah hian mitin kan fir lehzual a ngai a, kan ram leh hnam himna hi kan kutah liau liau a awm tih i hrereng ang u.
Pawl hrang hrang pawhin kan thiam dan dana hma kan lak hi a tul chang a awm tih hria ila, tuna MZP in nikhat thilthua an hmuhchhuah ringawt pawh hi tam tak an ni. A dang engzah tak la awm ang maw?
Tun atang hian khauh leh fir zawkin kan inhungbingna hi kengkawh ila, sorkarin ruahman tha zawk siam sauh sauh se la, a pui tur leh an tha tichak turin mipui lam pawh i lo inbuatsaih ang u. Kan ram leh hnam hi mitinin kan vei a, kan humhalh tlat a ngai e.