Mizo Zirlai Pawl (MZP) chuan khauh zawka Inner Line Permit (ILP) kenkawh tul an tih thu an sawi.
MZP General Headquarters hruaitute’n Thawhtanni khan Aizawl Press Club-ah thu thar thehdarhute an kawm a. MZP Gen. Hqrs., President Dr C Lalremruata chuan Inrinni kaltaa ILP an enfiahnaah, thil diklo an hmuh chhuah zingah mahni leh mahni (hnamdang leh hnamdang) in sponsor te an awm tih sawiin, “Khauh zawka ILP kalpui leh kenkawh a tul,” a ti.
Mizote hi chimral tham lek an ni tih sawiin MZP President chuan, ILP check chungchangah a tul anih chuan MZP hian nasa takin hma a la zel dawn tih a sawi a. Mizo hnamdang chhawr leh hlawkna um a vai sponsor leh an thlavang hauh thin tun thlenga an la awm chu MZP chuan mak a tih thu sawiin, “Mahni hnam hralhtu ah MZP chuan a ngai a ni,” MZP President chuan a ti.
Dr C Lalremruata chuan, Inner Line Pass pe chhuaktu lam pawh fimkhur zual tur leh diklo taka an pekchhuah an hmuh chungchangah, a pe chhuaktu hrem anih ngei theih nan a hma la turin thuneitute an ngen tih a sawi a. Mizoram sorkarin Gazette Notification No. F. 22015/1/2012-HM dt. 25th November, 2016 a tihchhuah self-sponsorship chu Non-Tribal Trade License holders neite tana an phalsak hi a mak an tih thu sawiin, sorkar hian he notification hi sut vat turin an ngen tih a sawi.
Hetiang bawk hian Gazette No. F. 22015/1/2012-HM, the 11th August, 2017 nain Non Tribal Trade Licence holders ten mi panga thleng managers/helpers an sponsor thei chu tha an tih loh thu sawiin, he thupek pawh hi sut nghal turin sorkar thuneitute a ngen tih a sawi bawk.