Law & Judicial department changtu chief minister Lalduhoma’n Mizo-in inneih, inthen leh ro inluahna dan a neih tihdanglamna ‘The Mizo Marriage and Inheritance of Property (Amendment) Bill, 2026 a put luh chu lungrual taka pawm a ni.
Thawhlehnia Assembly Budget Session-ah he bill pu luttu chief minister chuan, dan tihdanglam tak ang chuan nupui pakhat bak neih phal a ni lo va, Nupui dang neih leh dawnin inthenna certificate phut a ni tawh dawn tih a sawi a. Nupui pakhat aia tam neih hi BNS, 2023 pawhin a khap tih a sawi.
Law & Judicial department enkawltu hian Mizo mipain hnam dang hmeichhia a neih chuan he dan hian a huam dawn a, Mizo hmeichhiain hnamdang a neih chuan he dan hian a huam dawn lo thung tih sawiin, “Mizo hmeichhiain hnam dang a neih chuan a Mizo nihna a tawp dawn a, an fate’n tribal nihna an claim thei dawn lo,” a ti.
Women Commission leh MHIP in duh dan leh ngaihdan an thlen thu sawiin chief minister chuan, “Mâk an nihin chan a nei mang lo, sum chhuah a nihin hmeichhiain an chhawm an la let thei thung. Mi thenkhatin an nupuite ma duh si lo vin, an tiduhdah a, a tawpa sum chhuah lo thei lovin an siam thin,” tia sawiin, dan tharah chuan hmeichhiain sum an chhuah pawhin an nupa thawh chhuah zaa 50 aia tam lo an chang thei dawn tih a sawi bawk.
Bill-a tar lan a nih dan chuan, dan tihdanglam tur atan hian MUP, MHIP, Mizoram Law Commission, Mizoram State Commission for Women leh Central YMA atangin rawtna dawn a ni.