DP&AR Minister K Sapdanga chuan District Commissioner (Bawrhsap) atan Mizo tawng thiam duh lo emaw, zir duh lo emawte chu district lama tirh tawh loh tum a nih thu a sawi.
Assembly Budget session neih meka Thawhlehnia zawhna leh chhanna hunah DP&AR Minister K. Sapdanga chuan, district-a Bawrhsap atan Mizo tawng thiam ngei dah tuma hma an lak thu a sawi a. Hemi chungchang hi DP&AR-in an sawi fo tawh a, district mipuiten rawtna tam tak an nei a, harsatnate pawh an nei mek niin an hria a, India state lian thenkhat chuan an cadre post-a kaisanna tur examination-ah hmun danga mite promotion an buatsaih dawnin tualchhung tawng an thiam em tih an test thin tih a sawi a. Mizoram chuan cadre hran a la nei lo chung chungin he kalphung hi zawm ve a tha lo maw tih ngaihdan a awm mek tih a sawi.
K. Sapdanga chuan, “IAS officer-te state dang atangin Mizoramah an lo kal a, an promotion atan a pawimawh avangin a tlangpuiin mipuite nghenga hnathawh an duh a, chuvangin district-a thawh chu an dil thin a, eng emaw chen ngaihpawimawh loh theih a ni lo mah se, Service Officer-te ngaihpawimawh avanga mipuiin an tawrh chu sorkarin a remchang loin a hria a, DP&AR chuan tun chinah hnam dang, tualchhung tawng hre lo, District Administration Office-a tirh ngawt chu a tha lo tiin, district office-a awm an duh a nih chuan Mizo tawng eng level chin emaw bituk neia thiam tir hmasak ni se tiin ruahmanna a awm mek a, hei hi tihhlawhtlin ngei pawh tum a ni,” tiin, Mizo tawng thiam lo, thiam duh lo emaw, zir duh lo emaw an nih chuan district lamah intirh bik tawh lo tura ngaihdan a awm mek a, tihpuitlin ngei tum a nih thu a sawi.