Jharkhand-a Chatra district huamchhungah Ranchi atanga Delhi pan tur air ambulance chesualin, a chuang mi pasarih an thi vek a, an zinga pahnih hi crew member an ni.
SP Sumit Kumar Agarwal chuan a thi zat hi sawichiangin, report kan dawn dan chuan mi 10 in nunna an chan niin kan hria a, chetsualna hmun hi a chhengchhiain, kal a harsa hle a, finfiah an nih hnuah mi pasarihin nunna chanin, chetsual dan kimchang hre turin black box report nghah mek a ni, a ti.
Directorate General of Civil Aviation (DGCA) lam pawhin thuchhuah siam nghalin, chhiatna thleng chu pawi an tih thu leh air ambulance chesual chu an hriat veleh a tul anga hnathawh an tan ve nghal thu an sawi a, thuchiang zawk puanzar thuai an tum thu an thuchhuahah chuan a tarlang.
Hetihlai hian chetsualna bial deputy commissioner Keerthishree G chuan finfiahna la siam loh nimahse thlawhna chetsual chhan chu thli tleh vang a nih a rinawm thu a sawi a, boruaka thlivir na tak insiam vanga chhiatna thleng ta nia an ngaih thu a sawi ve bawk.
Thawhtanni zantir khan Ranchi airport chuan an tumhmun atanga air ambulance a tlawhchhuah thu an sawichiang a, a hnu lawkah an inbiakpawhna a chhiatzui thu leh station dang pawhin an biak pawh theih loh thu an sawi a, airport thuneitute pawhin sorkar hnenah chhiatna thleng ta chungchanga an report neih ang ang an hriattir nghal thu an sawi.