Thawhtan zan khan English Premier League khelh chhunzawm a ni a, inkhel awmchhunah Manchester United chuan Benjamin Sesko goal thun hmangin Everton an hneh. Everton hnehtu United hian Chelsea an lehpel a, palina an luah nghet.
Goodison Park ah Everton hmachhawn tura lenglut Manchester United hian Palina luah kir leh turin chak an mamawh. Mikhual an nihna hmunah an chak a nih chuan Chelsea leh Liverpool te point thumin an kalsan thei dawn a. Point thuma sang fal chunga palina luah chu an tan thil thlakhlelhawm leh tha tak a ni. An mamawh point hlawhchhuak a, palina an luah ngheh vangin United in champions league khelh phak an hnaih deuh deuh zel.
Goodison Park-a lenglut Manchester United hian bul an tan tha viau a, inkhel tan tirh tehah goal an thun nghal teuh hle. Fuh taka an khingpuite nawr tlang nghalin Amad Dialo chuan goal a thun teuh viau. Everton si nghak Jordan Pickford-a’n dang hman tawh lo mah se an defender ten goal line bul atangin an lo dang hman hlauh a, vanneihthlak takin Toffees an him hram.
Team hnihte hi goal thun tumin an innawr tawn nasa viau a, hlauhawm awh an nei ve ve. Inkhel hmuhnawm takah goal lut a awm theih loh reng hnuin Michael Carrick-a team te an che fuh ta nge nge. Everton in goal thun an tum luatah an chesual a, United in an nawr let thut. United forward Cunha chuan hla taka goal Bryan Mbeumo chu dik leh fuh takin ball a pe. Mbeumo hian a laiah fuh taka tlan lut Benjamin Sesko tan fuh takin ball a pe a, Sesko hian nghak khawtlai lovin minute 71-naah fuh takin a pet goal. Sekso goal thun hi United in an chakpui zui ta a ni.