Aizawl : Department of Personnel & Administrative Reforms (DP&AR) changtu minister K Sapdanga’n sorkar hnathawk aikal la mi 37 hrem an nih tawh thu leh mi 29 service tihtawpsak an nih tawh thu house a hrilh.
Thawhlehnia Assembly Budget Session-ah member Lt. Col. Lalhmingthanga zawh belhna chhangin DP&AR minister chuan, aikal lak vangin sorkarin a hnathawktu mi 37 a hrem tawh tih a sawi a, chung zinga 29 te chu an service tihtawp an nih tawh thu leh mi pariat te chu minor punishment pek an nih thu a sawi a. Chu chu an ACR-ah te ziahlan niin, an service zel atana pawi thei tih a sawi.
DP&AR Minister chuan department chhunga aikal la awm leh awm loh hi concern secretary, head of dept leh a controling authority te mawhphurh a nih thu a sawi bawk.
Officer transfer leh posting tehfung chungchangah zawh belhna chhangin DP&AR Minister chuan, civil service bikah chuan an awmna department milin an thiamna te, an tawnhriat te, post an lo chelh tawh te, promotion an hmuh tawh te, an hmuh zin leh khat dan te ngaihtuah vek a ni, a ti a. Heng piah lamah hian humaniarian ground awm lehin, officer-te hriselna dimdawi a ngaih chang a awm a, officer te kawppui, chhungte lam hnai tak an enkawl te, harsatna tawkte an lo awm ve bawk tih sawiin, heng dinhmun hrang hrang ngaihtuah hian posting siam thin a nih thu a sawi.