Aizawl Municipal Corporation (AMC) buatsaihin Nilaini khan Lammualah ni thum awh tur, Aizawl mei mit loa a din champha lawmna, Aizawl Day 2026 hawnna neih a ni.
AMC Municipal Commissioner Joseph H. Lalramsanga kaihhruai hawnna inkhawmah khuallian Aizawl Mayor Lalrinenga Sailo chuan thu sawiin, AMC hmalakna hrang hrangte a sawi a. AMC chu dan kengkawhtu an nih avangin mi thenkhatte atanga diriamna an tawh thin thu a sawi.
Lalrinenga Sailo chuan khawpui dangah chuan municipality hi kum 100 chuang kal taah lo ding tawhin, an hmasawnnaah hmun pawimawh tak an chan thu a sawi a. AMC hi kum 2010 atang chauha din a ni chungin a thangduang hle a, Aizawl hmasawnna leh a chengte tana service pek kawngah nasa takin hna a thawh thu a sawi.
Aizawl Day lawmna inkhawmah hian pawl leh mi mal 94 hnenah lawmman leh chawimawina hlan a ni a. International leh national level chawimawina leh lawmman dawng, Aizawl tihmingthatu mi 21 hnenah Aizawl Day Award sem a ni a. Local Council tha 10 thlan chhuah te hnenah lawmman pek a ni a, faina kawnga thawk tha pawl leh huho 12 leh mi mal 35 hnenah chawimawina hlan a ni a. Sanitation worker tha thlan chhuah paruk leh bawlhhlawh phur motor khalhtu tha 10 thlan chhuahte hnenah chawimawina hlan a ni bawk.
Aizawl Day 2026-ah hian ei tur leh thil chi hrang hrang zawrhna stall hawn a ni a, naupang tana a thlawna infiamna hmun buatsaih a ni a, Cosplay leh concert ropui tak huaihawt a ni a. Mayor’s Cup – Inter Futsal Tournament khelh mek a ni bawk.
Aizawl Day lawmna atan hian February ni 23, 2026 khan NHM, Health Department te nena tanghoin bawlhhlawh sawngbawltute tan One-Day Health Checkup, SWMC, Tuirialah buatsaih a lo ni tawh bawk a ni.
Aizawl Day hi February 27, 2026 thleng Lammualah hman a ni dawn a ni.