Aizawl : Mizo Hmeichhe Insuihkhawm Pawl (MHIP) chuan Nilaini khan ‘Women Icon Award 2026’ dawngtu Lalrinpuii, Minister, Health & Family Welfare Department; Social Welfare, Women & Child Development Department chu lawmpuina an hlan.
Lalrinpuii hian February ni 11, 2026 khan New Delhi-a Achievers’ World, Indian Achievers’ Forum leh All India Business & Community Foundation (AIBCF)-te tanghovin an buatsaih ‘National Summit 2026 – Vikshit Bharat 2047 through Comprehensive Socio-Economic Development’ ah khan ‘Women Icon Award 2026’ hlan a ni.
Lawmpuina dawngtu Minister Lalrinpuii chuan MHIP chungah lawmthu a sawi a. Award buatsaihtute hian Bangalore-a hmeichhia leh mi harsate a lo tanpui thin dan te leh Mizorama hmeichhe Cabinet Minister hmasa ber a nih thu te lo hriain, a department chante’n Viksit Bharat 2047 nena inrem takin Mizoram Universal Health Care Scheme hmanga mipuite hnena man pe lawk lo (cashless)-a health insurance an pek bakah ‘Ruangphurh’ policy hmanga mi retheite in lum ngeia an chhungte ruang an phurh thlensak chu ropui an ti a, India ram tana Mizoram chhunga a hnathawh chu chawimawi tlakah ngaia award an hlan thu a sawi.
Lalrinpuii chuan award a dawn tuma Mizoram chu CSR dawng tlem ber a nih avanga company liante chu CSR rawn chhunglut tura a sawmna chuan ‘Father of CSR in India’ tia an koh thin Dr. Bhaskar Chatterjee-a beng verhin, CSR 1% chauh luhna Mizoram chu a tinzawn nghal dawn a, an indawr mek thu leh Aizawl lo tlawh a tum thu a sawi.
Minister chuan MHIP changtlun zel nana theihtawp a chhuahpui tur thu sawi bawkin, MHIP chu rual ute’n hmeichhe tanpui ngaite leh khawtlanga harsatna tawkte tanpui a, hmeichhiate tana hamthatna awm apiang ngaihtuahpui a, hmeichhiate hmasawn theihna tura an lo din a nih anga vawng nung zel turin a chah bawk.