Aizawl : Horticulture Minister C Lalsawivunga’n Mizoram tihmingtha khawpa sapthei thar beihpui thlak an tum tih a sawi.
Nilainia Assembly Budget Session-ah Siaha bialtu MLA Dr. K. Beichhua zawhna leh zawh belhna dangte chhangin Horticulture Minister C. Lalsawivunga chuan sapthei thar chu nasa takin beihpui thlak an tum mek tih sawiin, pilot project siamin, nikumah bul an tan tih a sawi a. Champhai district, Khawzawl district, Saitual district, Serchhip district leh Aizawl district hmun thenkhatah beihpui thlak tum tih a sawi.
C Lalsawivunga chuan ram chhung hmun thenkhatah sapthei hi thar ve bawk mah se, Mizorama thar chhuah a tluk lo hle a. Mizorama sapthei chin ang chu India hmun dangah a awm ve loh avangin Mizoram economy atan leh kut hnathawktute intodelhna hmanraw tha tak leh kawng pawimawh tak a nih an beisei tih a sawi.
C. Lalsawivunga chuan, India mai pawh ni lo khawvel huapin sapthei hralhnaah harsatna a awm loh avangin, Mizoram tihmingtha khawpa sapthei chu beihpui thlak an tum mek tih a sawi a ni.