Aizawl : Zoram Medical College & Hospital-a Department of Microbiology leh Department of Community Medicine chuan ‘One Health Mission’ hnuaia vantlang tana hna thawhna hun an ruahmanah, February 24 khan Aizawl Zoological Park Sakawrtuichhun-a thawktute an hriselna an endik sak.
Huan-a thawktu (caregiver) te hi ni tin ramsa enkawl thin, ramsa nena inngheng reng an nih avangin, sa leh mihringah natna inkaichhawn theih chi a lo awm thin nen, an taksa hriselna dinhmun enfiah leh hriatchian an mamawh em em a, chumi tihlawhtling tura thisen endik bakah hriselna lam kaihhnawiha an hriat tur pawimawh thlenga inhrilhhriatna hun hi hman a ni.
He programme hi EF&CC deparrtment-a Chief Wildlife Warden, Aizawl Zoological Park director leh hotu dangte bakah ZMC&H hotuten an telpui a. Aizawl Zoological Park chuan hetiang hun ZMC&H lamin an buatsaih sak chu lawmawm an tih thu an sawi.