Aizawl : Chief Minister Lalduhoma chuan Lungleia Mizoram State University Headquarters dah chu Lungleiah Administrative Block awm se tihna mai a ni tih a sawi a. Nikuma House-a Bill put luh a nih tuma eptu member-te’n Lungleia awm tura an duhthu an sawi laia tunah an sawisel chu mak a tih thu a sawi.
Bill sawi hlawh tak ‘The Mizoram State University (Amendment) Bill, 2026’ chu Nilaini khan Assembly Session-ah Higher & Technical Education Minister Dr. Vanlalthlana’n House-ah a pu lut a. He bill sawihona a khaikhawmnaah Chief Minister chuan, Mizoram State University din tur chu campus zau taka zirlaite kal dur dur ang a ni dawn lo va, office awmna tur a ni tih sawiin, cluster college-ah zirlaite’n class an kal mai dawn tih a sawiin, “Administrative Block chu Lungleiah awm rawh se tihna mai a ni. Zirtirtu chu sawi loh, 4th grade pakhat pawh a khawih buai dawn lo va, a ngai angin a awm dawn a ni,” a ti.
Chief Minister chuan Mizoram State university din tur hian sorkar hmasain fel takin ruahmanna an siam a, a zirchiangtu turte dinin State university chu a thar hlaka din an tlin lo an tih avangin cluster hmanga din tur leh a headquarters pawh Aizawl-a din turin an rawt a, he rawtna bawhzui hian khatih laia Higher & technical education minister hovin draft bill an chai chho va, inthlan a nih avangin thui tak an bawhzui hman lo tih a sawi.
ZPM an sorkar hnuah bawhzuiin, sorkar hmasain Aizawlah a tih angin March ni 4, 2025 khan Bill chu House-ah put luh a ni a, hemi tuma an sawihonaah eptu member-te’n Lungleia awm tura an duhthu an sawi a, senior leader an nih avangin an sawi ang kha a tha zawk ang an tih avangin Lungleiah an dah leh ta tih sawiin Lalduhoma chuan, “Tunah an sawisel leh tho chu mak,” a ti.
Lalduhoma chuan State dangah pawh State University hi state khawpuiah an dah kher lo va, Mizoramah pawh Lungleia dah tur a ni chu mi tih dan lo a ni lo tih sawiin, “Aizawlah thil engkim an ekbeng nasa a, MZU, NIT, RIPANS, Vety College, ICFAU, IASE, Law leh Hindi College, College of Nursing leh thil dang dang an neih tawh avangin insem tlan thiam a ngai ,” a ti bawk.
‘The Mizoram State University (Amendment) Bill, 2026’ chu member-te’n an sawiho hnuah pawm a ni.