Thlasik khawvawt a liam chho tan ruai ruai a, thal khawro hun kan hnaih hret hret zel e.
Tuihna a kang chat chho ang a, thingkungten an hnah hlui paihthlain, an tlak kawlh chhoh hun a thleng leh tan dawn. Khawlum uap churh chu kan hmabak a ni leh mek.
A hma zawng aiin kan tui mamawhna a sang dawn a, Aizawl khawpui phei chuan tui kan harsa leh dawn tih chu ngaihtuah mai pawha chiangsa a ni. Kan tui lakna ber Tlawng luiin min chawm seng tawh mawlh lo a, pump tur a tlem chho leh telh telh dawn nen, hetih hun atan hian sorkar a lo inbuatsaih em le?
Kumtin kan harsatna hi a ngai ang bawk a la nih reng chuan hmasawn lo zia a ni a, sorkar hian a ngaihtuah a ngai hle. A changtu minister hian kan tui neih dante hi a hria em? Thal khawro lai pawha kan buai lohna turin tui lak dan kawng dangte hi a hria em? Ngaihtuah berah min neihpui em? Mipui lam hian kan kawh rawn leh thup tur a ni tih hriain lo inhmakhua thei se a va duhawm em.
Tui hmanga eizawngte chu an hlawk leh teh meuh dawn mai. Mahse, chung mite chuan kan khamkhawp min pe chuang si lo. An indaih lo thin em em a, an lakna hmun a hlat telh telh bakah, thenkhat phei chuan a thianghlim leh thianghlim loh pawh ngaihsak lem lovin an duhna lai laia mi min pe a, mipui lamin kan finfiah thei tawh bawk si lo.
Hengte a nih avang hian tun atangin thal khawro hun pawha kan buai lohna tur, tui hna a lo kang chat deuh a nih pawha mipui lam buai loh dan tur hi kan ngaihtuah ran a ngai e.