Bodo-Glimt-in Inter Milan tlawhin thawhlehni zan playoff second leg-ah goal hnih goal khatin an hneh a, vawi hnih an inkhelhah chak zawnin an club chanchina a vawi khat nan Champions League round of 16 an lut.
Norwegian club hian kar hmasa khan vawi thum European champion ni tawh Inter Milan mikhualin goal thum goal khatin an hneh tawh a, khelmual hmingthang San Siro chhunga mipui singsarih chuang hmaah season liam ta Champions League-a final lut Inter an leh a, a belh khawmah goal nga goal hnihin an chak a ni,
Champion League tia European club inelna sang ber an kalpui atanga Norwegian club zinga knockout round lut hmasa ber an ni a, minute 58-ah Inter defender Manuel Akanji a che sual a, Jens Petter Hau-je chuan remchang hmuh phahin a khung a, Champions League kal meka goal ruk a thunna niin Norwegian player zingah Norwegian club tan European club inelna sang ber tournament vawi khata khung tam ber a ni nghal.
A hnuah Akanji chuan a tihsual a siam tha teuh viau a, goal ban a pet per a, minute 72-ah Hauje-a siamsak atangin Hakon Ev-je chuan si hnih faia hma an hruai nan a pet lut zui leh a ni.
Minute 76-ah Alessandro Bastoni chuan Inter tan khung ve mah se awmzia a nei thui lo va, Bodo lakah mualphothlak takin vawi hnih an tlawm zawn.
Playoff second leg inkhel dangah Newcastle United-in goal thum goal hnihin Qarabag an hneh a, vawi hnih an inkhelhah goal kua goal thumin an chak a, playoff khelh ngai lova tlang Arsenal, Manchester City, Liverpool, Chelsea leh Tottenham zuiin English club parukin round of 16 an lut.
A tir minute ruk chhungin Sandro Tonali leh Joelinton chuan Newcastle tan an khung a, minute 50-ah Azerbaijan club Qarabag tan Camilo Duran chuan an si phurh sut then mah se Sven Botman chuan tauh lutin Newcastle-in goal thum goal khatin hma an hruai zui leh nghal a ni.
Newcastle-in penalty chawiin minute 57-ah Marko Iankovic chuan petin goalkeeper Aron Ramsdale chuan a dansak na a, Elvin Cafarguliyev chuan ball per changin mikhual team si phurh sut then nan a pet lut zui a, goal dang erawh a luh belh tawh lo.
Atletico Madrid-in goal li goal khatin an mikhual Club Bru-ga an hneh bawk a, a belh khawmin goal sarih goal liin an tlang.
Atletico forward Alexander Sorloth chuan a vawi khat nan Champions League-ah hattrick a siam a, minute 23-ah goal hmasa ber pet lutin second half-ah goal hnih a thun belh a, second half tirah Johny Cardoso chuan Madrid club tan a khung bawk. First half tawp lamah Joel Ordonez chuan an si phurh sut mah se chawlhlawk hnuah Belgian team-in goal thum an chhuah belh a ni.
Bayer Leverkusen-in si hnih faia an hneh tawh Olympiakos an mikhual ve thung a, goal awm lovin inhnehtawk mah se an chak tawhna chhawrin an tlang a, round of 16-ah team 36 inel zinga sang ber Arsenal emaw pahnihna Bayern Munich emaw an hmachhawn a ngai dawn a, zaninah inkhel vawi li awmin playoff zawh a ni ang a, zirtawpniah Nyon-ah round of 16 atanga final thlenga an khelh chhoh dan tur an pawt fel ang.