Sports Minister Lalnghinglova Hmar-in Empowering Mizoram Sports (EMS) hnuaia training/coaching dil duhte’n mobile phone hmanga awlsam zawka dilna an theh luh theihna tura duan, EMS website ’ems.mizoram.gov.in’ a tlangzarh.
Tlangzarhna inkhawm hi Sports Minister pisa-ah neih niin, Lalnghinglova Hmar chuan EMS chungchang a sawi fiah a. Mizo thalaite’n infiamna lama hma an sawn theihna tur leh kum 2036-a India-in Olympic Games a thlen tura Mizo thalai tam lehzual an lan theihna tura sorkar hma lakna pawimawh tak a nih thu a sawi.
Lalnghinglova Hmar chuan Mizoram pum tuamchhuak sports coaching leh talent haichhuahna liantham kalpui tum a nih thu a sawi a, hmun kilkhawr zawka naupang kum 8 – 15 inkar talent nei tha tak tak, training mumal dawng si lote chu zawn chhuah a, an bana kaih a, Mizoram leh India aiawh thei tura chher chhuah tum an nih thu a sawi a. EMS kalpuina tur hi ‘The Mizoram Bana Kaih (Hand holding) Scheme’ hnuai atangin Rs nuai 250 sanction a nih tawh thu a sawi bawk.
Mizoram sorkarin hmathlir mumal tak nei chungin sports-ah hma a la a, a bulthut atanga infiammite zirtirna pek chu a ngaipawimawh tih sawiin Sports Minister chuan, “India-in Olympic Games 2036 thlen tumin hma a la mek a. Khawvel huap inelna sanga Mizo thalaite tel ve thei tur chuan tun atanga hmalak a tul a. EMS pawh ‘Vision 2036 Olympic Games’ nei chunga duan leh kalpui tur a ni,” a ti.
EMS hnuaiah hian Mizoram hmun hrang hrangah naupangte basic coaching pek an ni dawn a, coaching hi ni 15 chhung atan niin, ni tin darkar 3, a vaiin darkar 45 pek an ni dawn tih a sawi bawk.
Mizote thiam zawng, khawvel huapa India a thatna ni bawk (Olympic qualification hnaihna ni a ngaih) sports discipline-te chu EMS hnuaiah ngaihpawimawh an ni dawn tih a sawi a. Sorkarin coach te leh an hlawh bakah sports equipment a tum dawn a, coach duh khua/veng te’n EMS website kaltlangin online-in dilna theh luh tur a nih thu a sawi.
Sports Minister chuan EMS hi phase hrang hranga kalpui tur a ni a. Ni 15 training-a tel naupangte tan district leh state level inelna buatsaih a ni ang. Heng inelnaa che tha leh theihna nei sang bikte chu residential mode-a uluk lehzuala training/coaching pek tura ruahman a nih thu a sawi bawk.