Finance changtu Chief Minister Lalduhoma’n kum 2026-2027 Mizoram budget Rs vbc 17,469.91 chu Ningani khan Assembly House-ah a pharh a. Sorkar kum kal lai mek budget Rs vbc 15,198.76 aiin zaa 14.94-in a tam zawk.
Kum 2026-2027 Mizoram budget a pharh rual hian Chief Minister Lalduhoma hian sorkar kum kal laia sum hman ruahman belhna Supplementary Demands for Grants 2025-2026 Rs vbc 3724.25 a pharh nghal bawk.
Budget a pharh takah hian sorkar inrelbawlna, sorkar hnathawk hlawh leh pension bakah leiba rulhna etc., (revenue expenditure) tur chu Rs vbc 14,094.47 tura ruahman a ni a, kum kal mek 2025-26 (BE) Rs vbc 12,384.70 atangin zaa 313.81 in a pung a. Budget pumpui atangin zaa 62.53 a ni.
Kum 2026-27 atana Pensionary expenditure hi Rs vbc 2,502.79 ni tura chhut a ni a, kum kal mek aiin zaa 11.19 in a sang bawk.
Ram hmasawnna ruhrel hnathawhna tur leh mipui hmasawnna atana sum ruahman (capital expenditure) atana ruahman chu Rs vbc 2,982.44 a ni a, hei hi kum kal meka ruahman Rs vbc 2,658.56 aiin zaa 12.18 in a sang a, kum thara sum hman tur zawng zawng atanga zaa 17.46 a ni.
Revenue Receipts estimate chu Rs vbc 14,994.31 a ni a, kum hma Rs vbc 2,046.70 in a pung a ni a. State’s Own Tax Revenue (SOTR) atangin Rs vbc 1,619.25 anga chhut ni a, heng zinga sum hmuhna lian ber chu GST niin, Own Tax Revenue pumpui atangin zaa 74.11 a ni a. Kum kal mek atangin Rs vbc 140.99 in a pung a, a punna rate chu zaa 9.54 a ni.
State in chhiah ni chiah lo atanga sum a hmuh State Own Non Tax Revenue (SONTR) Rs vbc 1,140.50 hmu tura chhut a ni.
Mizoramin sum a hmuhna hnar lian ber, central-a chhiah tlingkhawm state-in an insem thin (Devolution of Central Taxes and Duties) atangin Rs vbc 8,608.08 beisei niin, kum kal mek atangin Rs vbc 1,495.85 in a pung a. Rural Local Bodies atan Rs vbc 73 leh Urban Local Bodies tan Rs vbc 47 dawn beisei a ni a. State Disaster Risk Management Fund (SDRMF) atan Rs vbc 51.3, Centrally Sponsored Schemes (CSS) atangin Rs vbc 3,320.15 ruahman niin, Enternally Aided Projects (EAP) atangin Rs vbc 130.15 ruahman a ni bawk.
Mizoram Budget 2026-27 a pharh zawha thu thar lakhawmtute a kawmnaah Finance changtu Chief Minister Lalduhoma chuan, leiba a pun chhan lian tak chu SASCI hi a ni a. SASCI sum hmuh reng reng hi puk anga kaltir zel a ni a. Kum 50 hnua a pung awm lova rulh tur, hmasawnna hnathawhna tura leiba tha chi a nih avangin SASCI hi sorkarin a tam thei ang ber hmuh zel a tum tih sawiin, “Puk anih avangin sorkar leiba/puk a ti lang sang thung. Tun sorkar kum kal mekah hian SASCI atang hian Rs. vbc 1,519 hmu thei tura ngaih a ni,” a ti.
Sorkarin an dinhmun dik tak aia sang GSDP figure an nei thin chu tha an tih loh thu sawiin Chief Minister chuan, “Tlahniam ta angin lan phah dawn mah se, huaisen takin figure dik thei ang ber hmangin, nihna dik pho chhuah kan duh avangin kum 2026-27 GSDP chu Rs vbc 43,814.9 anga chhut a ni a. Kum kal mek atangin Rs vbc 4,290.67-in a pung a, a punna chu za zela 10.85 a ni,” a ti.
Sorkar laipui vision Viksit Bharat tih hlawhtlinna kawnga a tam thei ang ber tha thawh ve an duh tih sawiin Finance Minister Lalduhoma chuan, “Mizoram pawh India ram hmasawnna kawnga hmasawnna kengtu pawimawh tak a ni thei ang tih kan beisei a ni,” tia sawiin, kum 2047-ah chuan India ram pumpui deh chhuah (GDP) atanga zaa 1 chu Mizoram atanga lo thawhchhuah ve an tum tih a sawi a. Service sector leh thil thar siamna lama hmasawnna chu an hmathlir pawimawh tur nia a hriat thu a sawi.
Chief Minister chuan, tun term chhungin an sorkar chuan kawlphetha chhit man tihsan emaw, chhiah lak lai mek tihpuina tumna an neih loh thu a sawi a. Nikuma Krismas dawna sorkar hnathawkte Krismas thilpek atana DA an tihpun hnuah, kumin April ni 1 atangin DA zaa 2 an pek belh leh dawn tih a sawi bawk.
- Budget 2026-27 tharah thil pawimawh dangte :
- MLA Local Area Development Fund atan Rs vbc 80 ruahman.
- Sorkar flagship programme, Bana Kaih (Handholding) scheme atan kum 2026-27 (BE) ah hian Rs vbc 350 ruahman a ni. Heta tang Rs vbc 150 chu thlai thar leina turin ‘Thlai thar leina under Handholding Scheme’ tiin a bik taka dah hran a ni.
- Road maintainance atan Rs vbc 183.25 dah.
- State-ina hna pawimawh bik a kalpuina tur State Priority Project atan Rs vbc 100 dah.
- Mizoram Universal Healthcare Scheme (MUHCS) bill pekna turin Rs vbc 130 dah.
- Social Welfare hnuaia ruihhlo ngaite enkawlna Home chhawmdawl nan Rs nuai 70 dah.
- P& E dept., hnuaia kawlphetha lei nan Rs vbc 550 dah.
- Excise & narcotics department hnuaia ruihhlo dona hmalakna atan head thar hawngin Rs nuai 40 dah.
- Art & Culture department hnuaiah Archeological Survey atan Rs nuai 1 dah a ni a. Music & Arts promite nan Rs nuai 10 dah.
- State chhunga NGO-te puihna atan Rs nuai 150 ruahman.
- Lo neitute 50% subsidises rate-a pipe lei theihna turin Rs nuai 250 dah.
- NABARD loan atanga rural infrastructure siamna leh tihchangtlunna turin Rs vbc 280 ruahman.
- Kum tharah SASCI atan Rs vbc 1,000 dah chhin a ni.