Aizawl : FCI State Level Consultative Committee Chairman K. Vanlalvena, Rajya Sabha Member ni bawk chuan Mizoram sorkarin Food Corporation of India (FCI) buhfai aia tha lo zawk leh to zawka open market-a buhfai a lei duh zawk chu fel lo a tih thu a sawi.
Aijal Club-ah thuthar lakhawmtute a kawmnaah K Vanlalvena chuan, thla tina Mizoram sorkarin FCI buhfai a mamawh zat chu quintal 54,790 a ni a. Mizoram sorkarin mipuite hnena buhfai a sem thin chu open market atangin leh FCI atanga a leite a ni a, FCI-ah an buhfai mamawh chu tun aia tam thlen se chu an chah theih reng thu a sawi a. FCI buhfai aia tha lo zawk leh to zawka open market-a sorkarin a lei duh zawk chu fel lo a tih thu a sawi.
K. Vanlalvena chuan, FCI chuan Mizoram mamawh zawng zawng phuhruk thei lo mah se, open market-a an lei hi tun aiin tla hniam se sorkarin sum a sen tur a hum tam zawk a rin thu a sawi.
FCI State Level Consultative Committee Chairman sawi danin, Nilaini thleng khan Mizorama FCI kudamah buhfai metric ton 21,132 a awm mek a. Sorkar kum 2024-25 chhungin FCI buhfai Mizoramah metric ton nuai 1,13,820 lak luh a ni a, sorkar kum kal mekah metric ton 96,842 an la lut tawh a ni.