National Sub-Junior Volleyball championship 2026 neih mekah Mizoram an chetha a, vawi thum an chak zawn tawh.
Mizoram hian an match hmasa berah Kerala an hmachhawn a, set hloh lovin hnehna an chang nghal. Set thum an khelh chhungin Kerala an thunun hneh viau a, point 25-12, 25-13 leh 25-18 in an sawp.
Kerala lakah tha taka an inlan hnuin Himachal Pradesh an hmachhawn zui leh a, set khat hloh bawk mah se set harsatna lian tawk lovin hnehna an chang ta tho thung. Himachal Pradesh lakah Mizoram in bul an tan leh viau a, set khatnaa an khingpui ten point 10 bak an hmu thei lo. Set an lak zawn hnuin set thumna an hloh ve thung. Set thumna hloh bawk mah se set lina chu awlsam takin an la zui leh thung a, Himachal Pradesh lakah hian 25-10, 25-13, 22-25 leh 25-14 in an chak.
Vawi hnih an chak zawn hnuin Ningani khan 2025-a pahnihna Delhi an hmachhawn a, harsa takin hnehna an chang zui leh. Mizoram hian Delhi lakah bul atan thain set hmasa pahnih an la zawn. Set hnih la zawn mah se khawlum vangin ngai an awh zo meuh lova, set hnih an hloh zawn ve thung. Set hnih ve ve an lak hnuin deciding set-ah team huaisen zawk Mizotam chu deuce-ah an chungnung hram a, Delhi lakah hian 25-18, 25-19, 22-25, 25-27 leh 18-16 in hnehna an chang ta a ni.
Polba, Hooghly, West Bengal a khelh mek National Sub-Junior Volleyball championship 2026-ah hian Mizoram hi Group B-ah an awm. Vawi thum chak zawn tawh Mizoram hian ningani vek khan Maharashtra an hmachhawn zui leh a, result kan tarlang hman lo.