- Dr. C. Lalrampana
Pathianin Nunna siam lo se, thihna hian awmzia a nei lovang. Engkim thawthei tawh phawt chuan nunna an nei a, nunna nei tawh phawt chuan thih hun an nei thin. Mihring bakah thilsiam tinrengte hian nunma an.nei a, thih hun pawh an nei thin. Thih hnuah chuan tawih ral mai loh chu hmabak kan nei lo. Mihring phei chu thih hnuah phum bo/hal ral vat loh chuan rimchhia hnãwmhne mai kan ni. Chuvangin, kan thih hnuah inngaiin inui thin hle mah ila inphum/inhal lovin kar khat pawh tuman kan inawmpui thei lovang. Chuvangin, inphum/inhal nghal vat vat kan mamawh thin.
USA-ah chuan mitthi ruang phurh man hi a chhan a zirin a inang lo. Sorkar hnathawk leh sipai emaw a thih chuan, a ruang phurh man hi US sorkarin a tum thin a, an chenna hmun thlengin a phurhsak thin. Hei hian vui man, $800 [t. 73,373. 63] thleng leh phurh man a huam a ni. Civil mi thihnaah chuan, a ruang phurh man hi an chhungte emaw ro reltuin emaw a tumsak thin. Mahse, state leh tualchhung sorkar thenkhatin tanpuina an pe thin. Ram pawn lama thihna a thlen chuan, US embassy emaw consulate-in tanpuina an pe thei a, mahse, a chhungte’n an phurh a ngai thin. US sorkarin tanpuina a pe thei a, ruang phurhna turin local funeral home-ah an ruahman thin. thenkhatin tanpuina an pe thei a, chungte chu: Social Security benefits: Vui man atan tanpuina an pe thei. Veterans benefits: Veteran-te chhungte vui man reimbursement an pe thei. Private insurance: Life insurance thenkhatin vui man a huam a ni.
Mizoram sawrkarin tuna ruang phurhna man a tumsak thin hi Sept. ni 1, 2024 atanga hman tan kha a ni a, Mizoram chhunga phurhna bakah Silchar atanga phurhna chauh a huam .
Ruang phurh man buaipuitu Social Welfare Department tarlan danin, ruang phurhna senso sawrkarin a tum sakna hi Sept. 2024, thla khan hawn a ni a, December thla atangin ruang phurh man hi pek tan a ni. September 1, 2024 atanga, Dec. ni 9, 2025 thleng khan Social Welfare Department chuan ruang phurh man dilna 1,613 an dawn atangin cheng nuai 167.81 an pe tawh a; Social Welfare Department hotute chuan ruang phurh man dilna hi online-a tih theih turin Portal siam a nih thu leh peihfel a nih tawh thu an sawi rualin, Portal hi hman tura tlangzarh a la nih loh thu leh thawktute tan pawh Portal hman dan training buatsaih a la nih dawn thu an sawi. Mizoram sawrkar chuan ruang phurhna senso tur hi kum 2024-25 leh kum 2025-26 atan budget-ah cheng nuai 500 ve ve a dah a; inkaihhruainain a tarlan danin, ruang phurh tur chu a thlenna tur km 20 aia hnai a ni tur a ni lo va, km 20 piah lamah chuan tu tan pawh hman theih niin lirthei thlen theih chin a huam a ni.
Ruang phurhna lirthei hman man chu State Transport Authority (STA) in rate a siam anga kalpui a ni a; ruang phurhna man sawrkarin a peksak hian lirthei pakhat chiah a huam a, lirthei hman theihah hian cheng nuai 17 man chin chunglam lirthei a huam lo a ni. Ruang phurhna hlat zawng chhût nan ruang chhuahna atanga a dahna hmun inkar hlat zawng lâk tur a ni a; lirthei thlen lohna khua a nih chuan lirthei thlen theih tàwpna thleng niin Ruang phurhna chu kawng tawi thei ber hman tur a ni.
Social Welfare Minister Lalrinpuii’n kum 2024 Sept. ni 1 atangin sawrkarin ruang 666 a phurh man Rs. 70,88,126 pek a ni tawh tih a sawi tawh a. Minister hian Social Media kaltlanga he thu hi tarlangin, 0September ni 1. 2024 .atangin Sawrkarin ruang a phurh tawh zat chu mi 666 a ni a. hemi atan hian Rs. 70,88,126 pek a ni tawh tih sawiin, mi 84 phurhna man Rs. 10,26,550 chu pek leh tura ruahman a ni tih a sawi. Tarlan tawh angin Mizoram sawrkar hian Sept. ni 1, 2024 atanga ruang phurh man bill a pek sak theih hnuah dilna a lut tam tawh hle a, sawrkar chuan budget a siamah cheng vbc. 5 chu ruang phurhna atan ruahmanin ruang phurh man chu mithi chhungten buaipui tawh lovin a phurtu Motor-te’n Social Welfare Directorate-ah an buaipui tawh dawn a, Department hotute sawi danin online-a dil theih turin Ruang phurh Application buatsaih mek a ni.
Kolkata-a Mizo awmte chuan an chenna khawpuia Mizoram ruang phurh haw ngaite senso chhawk nan sorkarin Mizoram chhunga a hman mek, ruang phurhna senso a tumsak thin ang chu hman ve theih se an duh tak zet tih an sawi.
West Bengal khawpui tlawha IPR Department buatsaiha zin mek, Mizoram Journalists’ Association (MJA) member-te nen an inkawmnaah Kolkata Mizo Welfare Association (KMWA) hruaitute chuan ruang thawn hawna senso chungchang hi an sawi a. Kolkata chu Mizote’n ram chhung leh pawn hmun dang an tlawh dawna an chhuahka a nih piah lamah damlo inentir an tam reng tih an sawi a. Heng zingah hian ruang nena haw ngai an awm fo thin a, tih tur tul hrang hrangte an buaipuisak thin tih an sawi. KMWA President C Lalmuanzuala chuan, “Thlawhnaa ruang pakhat phurh hawna man bik chauh Rs. 15,000/14,000 vel sen a ni thin a, ruang sawngbawlna leh tul dang zawng zawng chu Rs. 40,000/50,0000 vel zet a ni thin a; rei tak damlo inenkawl tawhte tan a hautak lutuk thin a ni,” a ti. Kolkata Mizoram House Joint Residence Commissioner Zoremthara Ralte-in New Town Mizoram House-a zanriah a buatsaih an kilho paha an inkawmnaah hian August, 2025 atanga tun thlengin ruang 15 thawn an ni tawh tih an sawi bawk.
Kolkata Mizo Welfare Association (KMWA) hruaitute harsatna tawh mek ang bawk hi India ram khawpui hrang hranga MWA awmte’n thihna an tawh a, Mizorama thawn haw ngai an neih apianga harsatna an tawh ve mek tho a ni a, chuvangin, kan sawrkar hian Silchar chauh huam lovin India ram pum khawpui hrang hrang huapzo MWA awmte tan Ruang phurhna senso budget siam kep ve vek thei se a va’n tihzia dawn tehlul êm! India ram khawpui [metropolitan city] hrang hranga Mizo awmte hi sawrkar hnathawk, conpany-a hnathawk leh a tam ber chu zirlai an ni a. Ruang inthawnhaw ngai an neih changin senso a sangin an hah thei hle a ni tih kan hriat thiampui a pawimawh hle. Kum tam tak India ram khawpui hrang hranga MWA-te hian Mizo tlawmngaihna leh lainatna nen ruang inthawn haw kawngah theihtawp an lo chhuah tawhin an chhuah mek bawk a , Mizoram sawrkar hian an phurrit phurh mek hi chhawk zangkhai ve thei tawh se a lawmawm ngawt ang.