Inrinni zana English Premier League khelhah Liverpool chuan awlsam takin hnehna an chang a, Anfield-a an mikhual West Ham United chu 5-2 in an sawp. Liverpool rual hian Brentford pawhin hnehna an chang ve bawk.
EPL season kal mekah beisei anga khel tha tluang hleithei lo Liverpool hian Anfield-a an ikhual West Ham lakah bul an tan tha a, chawlhlawk hmain goal thum ngawt an thun hman. Reds tan hian Hugo Ekitike chuan inkhel tan atanga minute 5-na lekah hmahruaina goal a thun nghal. Hma takah goal an thun vangin an phur a, an inringtawk zui viau bawk. Phue leh inringtawk taka inlan Reds tan hian Virgil van Dijk chuan minute 23-naah an goal hnihna a thun a, an hmahruaina a tizau. Van Dijk goal thun hnu hian Alexis Mac Allister chuan chawlhlawk dawn hnaih minute 43-naah an goal thumna a thun belh zui leh a, 3-0 a hmahruai chungin chawlhlawk an hmang.
Chawlhlawk hma goal thum ngawt chhuah tawh West Ham in chawlhlawk hnu lamah bul an tan tha a, second half tan atanga minute lina lekah Tomás Soucek chuan goal thunin an si phurh a sut then. An goal thun vangin phur thar bawk mah se Liverpool tan Cody Gakpo chuan minute 70-naah an goal lina a thun belh zui leh a, Hammers nen an inkarah goal thum a tlazep nawn leh.
Fakpo goal thun hnu lawk minute 75-naah Valentín Castellanos chuan West Ham tan goal thunin an si phurh a sut then a, an inkar a zim ve leh hret. An inkar zim nawn leh mah se West Ham player Axel Disasi chuan minute 82-naah an lamah a ti-goal palh a, Liverpool goal ngana a thunsak. Disasi goal thun hnu hian goal dang a luh belh thei tawh lova, Liverpool chuan an mualah 5-2 in hnehna an chang a, phu takin point thum an hmu.
Tlahniam thei dinhmuna ding mek West Ham sawptu Liverool hian Chelsea lehpelin pangana an luah lailawk a, palinaa awm mek Manchester United point hmuh zat point 48 an hmu ve chiah bawk. United leh Chelesea hi Pathianni zan khan an inlan a, an tlawm ve ve a nih chuan Liverpool tan result tha a ni ngei ang.
Zirtawp zan khan pathumnaa awm mek Aston Villa chu table mawngphaha awm Wolves lakah rin loh takin an tlawm a, an dihmun a derthawng sawt hle. Villa tlawm hi Liverpool tan lawmna a lo ni ve hlauh thung.
Inrinni zana inkhel dangah Brentford chuan mikhual an nihna hmun Turf Moor-ah 4-3 in hnehna an chang a, point thum hlu tak an hmu. Brenford tan hian Mikkel Damsgaard chuan minute 9-na lekah hmahruaina goal a thun a. Hun pangaiah 3-3 a an inhnehtawk hnuin hun pek belh minute 90+3-naah goal pawimawh tak thun belh lehin Brentford hi hnehna pawimawh tak a chanpui.
Brentford tan Damsgaard-a’n goal hnih a thun bakah Igor Thiago leh Kevin Schade ten goal khat ve ve an thun bawk. An mualah tlawm pumpelh tuma tan khawh nasa tak Brentford tan Michael Kayode, Jaidon Anthony leh Zian Flemming ten goal thun bawk mah se tlawm erawh an pumpelh thei ta chuang lova, an mualah uiawm takin an tlawm zui ta tho a ni.