Mizorama thalai intawhkhawmna lian ber ni hiala sawi KTP General Conference chu nizan khan a tiak ta a, khati zat khawmpui kal tur kan la hmu thei kha hmuh leh hriat a nuam a, Kristian rama thleng tur dik tak niin a lang bawk.
Thalaite hian khawvel hmasawnna hrang hrang kan tem chho zel a, tunlaiah phei chuan kartin mai pawh ni lo, zantin deuh thaw khawvel thila chhuahna tur leh tih tur, thalai inhmuhkhawmna a tam tawh hle. Pathian lam hawi lem lova, mahni tal tala tal tan pawh inawihtleina hi a lo awm ve teh meuh tawh mai.
Chutiang chu kan ram dinhmun a nih tawh laiin KTP khawmpui lian a han thleng leh ta chiah a, a buatsaih leh a lo dawltu/thlengtu lam tan chuan phurrit chu a nih teh meuh rual hian thlalai khati zat Pathian faka an zai a, an lam hmuh kha a nuam a, kan la he-heu vek bik lo tih a chiang hle. Pathian pawhin mal a sawm ngei a rinawm bawk.
Khawvel hmasawnna leh harsatna hrang hrang karah hian KTP/TKP/PYD/SAY khawmpui lian hi a lo inherchhuak leh fo thin ang a, a buatsaihtu lam hian eng dinhmunah pawh ding se, a hautak leh harsatzia chu eng pawh lo nise, thalaite Pathian faka an zai a, an lam ringawt pawh hi a hlu a ni tih an hriat a, an la uar zual sauh sauh zawk a tha hle.
Thlarau lama hlawkna a tel vek theih loh a nih pawhin tisa thila Pathian avanga hlawkna chu a awm thei ngeiin a rinawm hrim hrim bawk.