Chief Minister Lalduhoma’n Indian Air Force (IAF) hnena Lengpui ram hralh chungchang chu Central Bureau of Investigation (CBI) chhui tura thawn fel a ni tawh tih a sawi.
Assembly budget session neih mek, February 27, 2026-a private member resolution sawihonaah he thu hi sawiin chief minister chuan, IAF hnena Lengpui ram hralh chungchang chu February 23, 2026 khan CBI chhui turin an thawn tawh tih a sawi.
Chief Minister chuan, “A ram neituin a chan a awm a, a commission titu pain a chan a awm a, an ccount-ah a lut a, a chhui theih reng a, chu an account atang chuan khawiah nge a chhuah leh tih an rawn chhui dawn a, a luhna account neitu tu chu banah i ti ang aw,” tiin CBI chhui turin an thawn fel tawh tih a sawi.
IAF hnena Lengpui ram hralh aiah rapthlak tur thil dang a awm tih sawiin, “Sairang ram lak chungchangah tunah hian a document ka nei vek tawh a, he house ngeiah hian statement siam kan la duh mai thei a ni, sorkar hmasa sulhnu vek,” a ti bawk.