February 27, Zirtawpni atang khan Indian Football League (I League ni thin kha) khelh tan a ni ta nge nge a, Mizo club pahnih Aizawl FC leh Chanmari FC ten hnehna an chang zo lo ve ve.
I League champion hlui Aizawl FC hian Mimualah Punjab club Namdhari an hmachhawn. Mikhual an nihna hmunah an khel tha viau a, goal thun hmasa zawkah an tang. AFC tan hian Vanlalhriatzuala chuan chawlhlawk dawn hnaih minute 43-naah hmahruaina goal a thun. Hriatzuala goal thun hmang hian hun rei tak chhung hma an hruai a, Namdhari lakah an chakpui teuh hle nghe nghe.
An mualah an tlawm ngei dawna a lan tawh hnuin Punjab club tan Abdoulaye Diallo chuan minute 90+6-ah goal pawimawh tak thunin an si phurh a sut. Diallo goal thun hnuin goal dang a luh belh thei tawh lova, Aizawl FC chuan uiawm takin point hnih an hloh. Namdhari lakah chak zo lo mah se point khat nena bul tan hi Aizawl FC tan result chhia a ni hran lo thung.
Zirtawp zana inkhel dangah Indian Football League-a club thar Chanmari FC chuan an mual RG Stadium-ah hnehna an chang zo lova, an mikhual Gokulam Kerala FC nen goal awm lovin an inhnehtawk. An mualah chak zo lo mah se Chanmari FC tan I League-a vawi hnih champion tawh Gokulam Kerala FC laka point hlawhchhuah hi bul tanna tha niin a ngaih theih.