Iranian Supreme Leader Ali Khamenei a thih thu a nemngheh hnuah India-a Muslim state, Jammu & Kashmir hmun hrang hrangah lungawi lohna lantirna huaihawt ve nghal a ni.
Iran sorkar thupuanna chuan Ayatollah hi Inrinni zing khan Israel leh US sipai tangrualten an rama beihpui an thlaknaah a thi niin an tar lang a ni.
Srinagar leh Bandipora-ah lungawi loh lantirna hi huaihawt a ni a, a huaihawttute chuan dan bawhchhiaa that nia sawiin an an thinrim tih an sawi a. Kashmiri Shia Muslim za tam tak chu khawlaiah Khamenei-a thlalak leh Iran thlawpna banner kengin an pung khawm a ni.
Srinagar khawpui kawngpuiah hian flag dum, Khamenei-a thlalak leh hnam dan anga lungngaihna hla (Nauha) an sa laite chu hmuh tur a awm.
Lungawi loh lantirnaa tel pakhat chuan news agency ANI hnenah, “Iran atangin revolutionary Supreme Leader Ali Khamenei chu a awm tawh lo tih thu kan dawng a. US leh Israel-in rapthlak takin an that a… He thil thleng hian min tilungchhiain na kan ti hle a ni,” a ti a. “Srinagar-a Shia Muslim tan Ayatollah Ali Khamenei-a hi ram dang politic hruaitu satliah ang a ni ve lo va, ani chu Marja-e-Taqlid (Emulation Source) a ni,” a ti.
Khamenei-a hi kum 30 chuang zet Supreme Leader lo ni tawh niin kum 86 mi a ni a, Islamic Republic puithiam ni Muslim tan chuan a hlu em em a ni.
Iranian Supreme Leader thah a nih thu sawi a awm hnuah Pathianni khan Peoples Democratic Party (PDP) President Mehbooba Mufti chuan Israel leh US chu na takin a sawisel nghal.
Thuchhuah siamin Mufti-i chuan ram pahnihte chetna chu ‘lungchhiatthlak leh khawvel chanchina zahthlak’ a ti a. Israel leh US chu ‘Iran hruaitu duh tak Ayatollah Ali Khanenei-a thah vanga intitheiah’ a puh bawk.
PDP chief hian Muslim ram eng emaw zatte ngawi tlat leh a thattute an thlawpna thuan sawi chu a lungawi loh thu a sawi a. “Muslim ramten chhia leh tha hriatna aiin uchuak taka thlawpna an pe hi a mak tak zet a ni,” a ti.
Mufti chuan Iran bula dingte leh a ngaihdan chuan mi tihduhdahtute lam hawite chu history-in a rel dawn tih a sawi a. “History hian tute nge dikna dotu leh tute nge tihduhdahtute puih tih hriatpuitu a ni ang,” tiin a sawi.
Iranian Supreme Leader Khamenei-a hi US leh Israel-te beihpui thlaknaah a thi a. Ram pahnih sipaite hian Inrinni khan an ram puma sipai leh nuclear hmunhma te nasa takin an bei a ni.
Khamenei-a thihna hi ram tangrual pahnih leh Iran inkara boruak tha lo a awm laia thleng a ni a. Thla tam tak kal ta atangin Iran, Israel leh US inkara inmil lohna hi awm tawhin inremna neih tuma inbiakna kalpui a ni a. A hnuhnung ber chu Zirtawpnia inbiakna kha niin a tukah chiah inbeihna hi a chhuak ta a ni.