Aizawl : February ni 26, 2026 atanga Saitual Public Playground-a Kristian Thalai Pawl General Conference vawi 61-na neih chu Pathianni zan khan a tiak.
Pathianni chawhma leh chawhnu inkhawmah Speaker Rev. PC Lalropuia hnen atangin Pathian thuchah ngaihthlak a ni a, zanah Central KTP Leader kal chhuak tur, Rev. H, Lalawmpuia’n Pathian thuchah a sawi a. Zan inkhawm banah Fakna Inkhawm neih chhunzawm a ni.
Inrinni nilengin Saitual Kohhran Biak Inah Central KTP Leader, Rev. H. Lalawmpuia kaihhruaiin rorel inkhawm neih a ni a, KTP kumpuan thupui atan Electric Veng Pastor bial atanga lut ‘Kritian Thalai leh Liberal Ideology’ tih thlan a ni a. Kum 2030-a KTP General Conference thleng turin Zawlnuam Pastor bial leh Borai Pastor bial thlan a ni a. Hei bakah hian ruihhlo do kawngah hmalak chhunzawm zel ni se an ti a, hmalak dan tur chu Central KTP-in lo ruahman se an ti a. Falkland-a Youth Recreation Centre pualin budget neih tawh rih loh an rel a, YRC hmunhma tihchangtlun an rel a, kum 2026-27 a KTP budget atan Rs nuai 93.5 an pawm a ni.
Hei bakah Central KTP-in a kalpui mek Street Ministry neih chhunzawm rawtna te, thupui zir tur rawtna hrang hrang lut zingah ‘Pathianni serh chungchang inzirtirna’ kalpui rawtna te pawm a ni a. KTP member zingah Biak In hawnga nupui pasal nei an lo tam theih nana hmalak rawtna pawm a ni bawk.
Kumin KTP General Conference-ah hian palai kal an thahnem hle a, Pathianni chawhma thleng khan palai inziak lut 47,039 an tling a. Pathiannia lehlanga inkhawmpui chhim an thahnem hle bawk.
Tun dinhmunah Mizoram chhung leh pawnah KTP branch 917 awm mekah member 1,81,131 (mipa 19,456 leh hmeichhia 71,675) an awm a. Nikum chhung khan KTP member 569 (mipa 502 leh hmeichhia 67) an thi a ni.