Leader of Opposition Lalchhandama Ralte-in ZPM sorkar chu eiruknaa fihlim ber nia an insawi laiin, Mizoram sorkar kal tawh zawng zawnga corruption lian ber, Lengpui ram hralhna leh ZPM chu a inzawm em tih chu a zawhna a nih thu a sawi.
Assembly budget session neih meka Zirtawpni zana private member resolution sawihonaah Tuivawl bialtu MLA ni bawk Lalchhandama Ralte chuan, “Mizoram sorkar kal tawh zawng zawngah corruption-a fihlim ber anga in (ZPM sorkar) insawi hi chu, Mizoram sorkar kal tawh zawng zawnga corruption lian ber, Lengpui Airport corruption case hi ZPM nen a inphiarzawm chat em tih hi ka zawhna a ni,” a ti.
Lalchhandama Ralte chuan, “Party pakhat ex-minister-in mipui hriat turin ‘Rs vbc 15 vel hi chief minister chan tur niawm ang taka langin kan hre thawi’ tiin chief minister nen a sawi pawlh mek laiin, media-in an interview-naah UNNATI atangin Rs vbc 15 vel a lo la leh chiah a. UNNATI chu tute’n nge hmang tangkai tawh an han ti a, CM chhungkua te kha an la lut lo a ni awm e, an ti leh si a,” tiin mipui ringhlelhna clarify turin a ngen.