- Dr. C. Lalrampana
Kan ram hruaitute leh Political Party-te thanmawh bawk lian tak mai leh an sim theih hauh loh chu Party dang sawisel tum hrim hrimna thalo tak leh dawt hlawm hlak leh thudik chanve hmanga inpuhtawna, inchirhtheh an chin tawh thin; an chin mek; leh an la chin chhunzawm zel hi a ni. Kum 80 chhhung zet Political party hrang hrang an insawrkar chhawk chhung zawng hian tute pawh khan thawk tha hle mah se, tumah infaka, inlawmpiia, inchawimawi tum an awm ngai reng reng lova, insawisel hrim hrim leh thudik chanve hmanga inpuhchhiat tawnna hlirinin an khat a, chu chu chuan Zoram mipui thinlung ngaihtuahna [mindsets] a tipiangsual zo tawh a, insawiselna chithalo tak a tuh zo vek tawh a ni.
Rorelna in [Assembly House]-ah state dangte hmuh leh hriata mawi tak leh entawn tlak tak ni awm takin gentlemen deuha inthuamin an khawsa a, session zawha rorelna in an chhuahsan rual rualin an ze ngai bawk an chhuahleh si thin. He an thil chin thalo tak [Bad practices/bad habit] hi engtikah tak bansan ang mawlet
Tupawh sawrkar se an thawh thatah fak ngam ila, an thawh that lovah insawisel nghal zel lovin huaisen takin hmangaihna tel chia al nen invenpui ngam zawk thin ila a tha ni nai turt
Tunah pawh tu sawrkarah mah la awm ngai lo tih hial turin Aizawl khawpui chhung kawngpui tha takin rulnganpa ang zar maia an han siam ta mek hi an thawk thain an fakawm takzet a ni. PWD SE Lalrinngheta chuan, “Tuna hna hi Aizawl kawngpui resurfacing project awm tawha la lian ber a ni a, km. 83 thawm that a ni dawn. Hna hi kum 2024-25 hmalakna niin, nikum April atang khan contractor-in a thawk tan. Kum 2025-26 hmalaknain km 20-30 hna a awm leh mek bawk,” a ti a; sorkar lakah an lawm thu leh, PWD Minister leh hotu dangte’n an enpui reng chuan inrintawkna a pek thu a sawi hial a ni. Hetiang taka pui tham leh chhenfakawma Aizawl khawpui chhung kawngpui thawm that hnathawh ang hi a la awm ngai lo hial awm e.
Aizawl khawpui kawng siam mek; April 15, 2026-a zawh hman tum hi ZPM hruaitu engemawzat chuan January 17, 2026 zan khan an empui a; kawng siam chu April 15, 2026-ah zawh hman tum a nih thu PWD hotute’n an lo hrilh. ZPM vice president C Lalnunnema chuan, Chief Minister leh PWD Minister te thahnemngaihna zarah Aizawl khawpuia kawngpui siam hna lian ber kalpui mek a nih thu a sawi. ZPM party hruaitute’n zana an tlawh hi Bungkawn leh Nursery Veng inkar kawng siam mek a ni a; PWD Aizawl Road North leh Road South hna vilnaa a khaikhawmtu superintending engineer Lalrinngheta’n hna an thawh dan tlangpui a lo hrilh a ni.
“Thál chhungin Aizawl leh district khawpuia kawng pawimawh siam kan tum” tia PWD Minister-in 10th January, 2026-a a sawite kha a ropuiin a nghahlelh awm hle. PWD minister Vanlalhlana chuan, tun thál chhungin Aizawl khawpui leh district khawpui kawngpui pawimawh zualte siam zawh hman vek tum a nih thu a sawi a, Vanglaini palai zawhna a chhan danin PWD Minister chuan, Aizawl khawpui kawng siam hna chu ngawrh taka thawh chhoh mek zel a ni a, “Tunah hian main road kan la zo lo deuh a, main road chiah lo pawh thenkhat siam a ni tawh. Kawng lûn zual lai kan zawh hunah a lûn lo deuh laite siam kan tum. Zan lamah kawng siam hna ngawrh taka thawh thin a ni,” a ti. Vanlalhlana chuan, kawng siam chu tha taka tih zel tum a nih thu sawiin, “A siamna tur sum min pe zel a, kan siam zel ang. Khaw kar kawng pawh siam a nih rualin, Aizawl leh district khawpui kawng ngaih pawimawh hmasakah neih a ni. Tun thál chhungin Aizawl leh district khawpui kawng pawimawh lai chu siam zawh hman vek kan tum,” a ti a, theihtawp an chhuah thu a sawi.
PWD Minister chuan, Aizawl – Thenzawl – Lunglei kawng pawh siam mek a nih thu a sawi a, “Lunglei lam atangin kawng siam tan a ni,” a ti. NH Sairang-Kawnpui kawng chungchang pawh sawiin Vanlalhlana chuan, “NHIDCL hnuaia contractor-te’n kawng siam hna an thawh tan tawh avangin kan vilpui lutuk tawh lo. Chutihrualin, tha tak leh rang taka zo turin kan nawr ve reng,” a ti a; contractor thenkhatin thál chhungin an chan chin zawh hman an inbeisei laiin, thenkhat chuan an beisei loh thu a sawi.
PWD Minister chuan, NH kawngpui thlúr li tura laih mek avangin fûr khat chu Mizoram châk lakna kawngpuiah harsatna a la awm theih thu a sawi a, “Four lane laih mek hian eng ang chiahin nge nghawng a neih dawn hriat a ni lo a, kan buai phah deuh mai thei. Sairang thleng rêl a kal tawh avangin Sairang-Kawnpui kawng chhia vanga harsatna lian tham mipuiin an tawh loh kan beisei,” a ti. [Courtesy: vanglainidailynewspaper]
Tun sawrkarin hetiang taka beihpui thlaka kawngpui siam hna a thawk ta mai hi a ropuiin mumang pawh a ang rum rum zawk hial a, chuvangin, fakna rimawi kan hlan ve hi kan tih makmawh niin a lang. Eptu party lamte erawh chuan an rilruin fakawm tiin lawm rllru hle mah se, an tlinlohna lai phawrh tum reng rengin an lo hmanhlel leh mahna let Rom 12:15 “Lawmte chu lawmpui ula, tapte chu tahpui rawh u.” tih hi chu zawm har kan tih thin a ni. Fak tlakte chu fak a, chawimawi tlakte chu chawimawi ngam mai hi mifel nihna kawng awlsam ber chu a lo ni e.