Aizawl: Supply Minister B Lalchhanzova’n furpuiah leh chhiatrupna lo thlen thulha buhfai dahkhawmna tur permanent fair price shop a tam thei ang ber sak a ni dawn tih a sawi.
Ningania Assembly Session-ah zawh belhna chhangin supply minister chuan Mizoram sorkarin kudam 112 a neih mek thu a sawi a. Furpuiah leh chhiatrupna lo thlen thulha buhfai dahkhawlna tur, permanent fair price shop a tam thei ang ber sa turin sorkar a inbuatsaih tih sawiin, hemi sakna tur hian NABARD atangin loan Rs vbc 5 hmuh a nih tawh thu leh a bul tan nan hmun 20-ah sak an tum thu a sawi bawk.
Supply minister chuan ration pek chungchangah party inthliarna a awm lo tih a sawi a. Ration dawn hi mi tin chanvo anga kalpui a ni a, ration mamawh ve lo tih loh chuan automatic-in fair price shop atangin buhfai an la mai thin a. ZPM sorkar hnuah buhfai dawn theih danah party inthliarna ang a awm thar thut a hriat loh thu sawiin, “Chuvang chuan, MNF leh INC te an chanvo an chan lohtir tih ang kha chu keini beng a thleng lo va, khaw tinah NSFA committee an awm a, committee ngaihtuah a ni a, hun hmasa lama hman reng a ni a. Party inthliarna hi ka hriat danah a awm lem lo,” a ti.
Supply minister chuan an sorkar tirhah retailer awmsate chu an hun chhung pangngai hmang zo vekin, a thar lak nan advertisement chhuah a ni tih a sawi a. Retailer buk dik leh dik lo chungchangah dik leh tha zawka hmalak zel tum a nih thu a sawi.
Buhfai qtl 82,000 hum tawh
Supply minister B Lalchhanzova’n buhfai bo thlau tur quintal 82,000 bawr vel hum tawhah an inngai tih house a hrilh.
Ningania Assembly budget session zawhna leh chhanna hunah member-te zawhna chhangin minister chuan retailer-te hnen atangin mi zawng zawngin ration buhfai an khul vek lo tih an hriat thu leh khul lohte pawh tun hma atanga an tih dan thin angin retailer-ten an tihriral thin thu a sawi a. Chu chu sorkar tan thil tha tak a nih loh thu a sawi.
Supply minister chuan, “Department chuan hei hi stock angin lo vawng tha sela, a thla leha an sem atan lo hmang rawh se kan ti a, theihtawp kan chhuah a, retailer-te pawh thawhpui an nuam khawp mai a, thu an awih a, harsatnate chu la nei deuh mah ila, hma kan sawn viau tawh a,” tia sawiin, tuna record anga hmuh theih ang hian, stock anga lo hmang se an tih atang hian buhfai bo thlau mai tur quintal 82,000 bawr vel hum tawha an inngaih thu a sawi a, hei hi bothlau mai tur humna a nih miau avangin hetiang kalphung hi chu khawvel huap leh India ramah pawh tarchhuah tlak a nih thu a sawi.