Australian Grand Prix neih tura inbuatsaihna a kal mek laiin thuthang a awm mek a, Bahrain leh Saudi Arabian Grand Prix chu thulh ngai dinhmunah a ding mek thung a, khawthlang chanchinbu thenkhatte phei chuan thulh tur ang hialin an tar lang hlawm.
Inrinni kal ta atang khan Middle East-ah US leh Israel tang dun chuan Iran an beihrawn a, Tehran hian phuba lak nan Israel a kah bakah an chhehvela US-in sipai a dahna hmunte a bei ve a, heng a beih zingah hian United Arab Emirates (UAE), Kuwait, Saudi Arabia, Qatar leh Bahrain te chu missile-a a beih zingah a tel.
Thuchiang engmah la awm lo mah se hetiang boruak karah hian Bahrain leh Saudi Arabia Grand Prix an thulh mai theihna chance hi a sang ta hle a. FIA-in Thawhlehni khan 2026 World Endurance Championship, March 26-28 Bahrain-a neih tura ruahman chu a hun an sawn tawh bawk.
Kum 2026 Bahrain Grand Prix hi April 10-12 a neih turin sawn a ni a, a dawt leh chiah chawlhkar tawpah Saudi Arabian Grand Prix hmanga chhunzawm tura duan a ni a. Saudi Grand Prix hi Jeddah-ah neih tura ruahman a ni.
Jeddah phei hi chu US sipai hmun bul lawk a ni a, nikum maiah pawh khan a bul hnai hi Iran-in a thawhpui Hezbollah hel pawlin an lo beih tawh a ni nghe nghe.
Hetihlai hian March 8, Pathiannia tan tur, Australian Grand Prix chu Middle East-a buaina chuan a nghawng dawn lo niin Australian GP huaihawttuten an sawi a, staff member thenkhatten an Australia an panna kawngah harsatna tawk mah se buaina a awm dawn lo niin an sawi bawk.
Australian Grand Prix bakah hian Formula 1 chuan thil thlen dan chu uluk takin an en dik ve reng bawk a, April thlaa Bahrain leh Saudi Arabia-a inelna neih tur chu harsatna awm lova thlentir an tum hle.