Aizawl: MNF party chuan Higher & Technical Education Minister Dr Vanlalthlana chu Minister a nihna atanga bang turin an phut.
Ningani khan MNF party chuan Dr Vanlalthlana chu bang tura phutin Vana pa Hall kawtah an pungkhawm a. Punkhawmah hian Rajya Sabha MP K Vanlalvena chuan Dr Vanlalthlana chu minister la naupang tak, la viak tha tak, minister a nih kum hnih chhung lek pawha a department enkawlah thil tha tam tak a ti a. Hetih rual hian minister in an tih thiang lo a tih avangin bang turin an phut tih a sawi.
K Vanlalvena chuan sorkar laipui atanga PM-USHA hnuaia college hrang hrang building siam thatna tur, Higher & technical department in Rs vbc 22.48 a hmuh, Assistant engineer chauh nei Higher and Technical department-in hnathawktu tur tender an chhuah thian loh laiin, dan bawhchhiain tender an chhuah a. Tender chu empanel firm leh contractor hrang hrangin an chhang a. Hnathawktu tura thlan zinga mi Royal Construction chu finance department-a empanel list-a a tel loh avangin ZPM MLA pathum leh MNF MLA pahnih awmna Commmittee on Petitions-in an chhui a, tender chhuah dan leh a thawktu tur thlan danah a dik tawk loh avangin cancel leh a, tender that leh nise tiin thutlukna an siam hial a. Tun hnuah hetiang a thlen tawh loh nan Dr Vanlalthlana chu a bang ngei ngei tur tih chu MNF ngaihdan a nih thu a sawi.
MNF party chuan Minister Dr Vanlalthlana banna chhan tur an sawi zingah, Mizoram State University Bill 2025 Assembly a sawiho laiin NEP 2020 angin Lungleiah Mizoram State University a dah theih loh thu uar takin a sawi a. A thusawi angin bill pawh pass a nih hnu, kum pawh a liam hmain Cabinet rorel angin Mizoram State University chu Lungleiah suan a nih tur thu a puang leh lawi a. Cabinet rorel anga sawn a nih thu a sawi hnu daihah Cabinet in By Circulation-in an pass leh hnuhnawh tih document atangin finfiah anih avangin Dr. Vanlalthlana hian dawt thuah hnih sawi a lailang chiang hle a, hei vang hian Minister ni zui tlakah an ngaih loh thu sawiin, Minister atanga a ban ngei an phut tih an thuchhuahah an tar lang.