Aizawl: India sorkarin Mizoram bomb hmanga a beih hriatrengna ni, ‘Zoram Ni’ chu Ningani khan MZP General Headquarters chuan MZP Conference Hall-ah an hmang.
‘Zoram Ni’ hmanna inkhawmah MZP President Dr C Lalremruata chuan thu sawiin kum 2008 atanga March 5 hi, India-in jet fighter hmanga Mizoram a beihna champha an serh tawh thin tih a sawi a. India prime minister-in August 10, 2023-a no-confidence motion parliament-a put luh tum khan, Indian Air Force-ten March 5, 1966-a jet fighter hmanga an beih thu sawi lang mah se, he thil hi Mizo mipuite khawngaihna emaw, ngaihdam dilna lam a ni lo va, politics thil a an inbeihna atan hman a ni tih a sawi.
MZP president chuan Zoram Ni an hmang thin chu India huat thar lehna emaw, hel tumna rilru chawh thawh tumna lam a ni lo va, lungrual takin he ni hi an serh-a, ram tana nunna hlantute leh hliamte chawimawina leh zahna an hlan nawn leh a, he ni hi hnam inpumkhatna ni atan, hliam hluite dam se hmalam panna ni atan an hmang tih sawiin, “MZP leh Mizo mipuiten kan beisei chu India hian a tihsual hi pawm se, Mizo mipuite lakah hian ngaihdam dil se kan ti a ni,” a ti.
Tun hnaia Assembly session-in ‘The Mizo Marriage and Inheritance of Property (Amendment) Act, 2026’ dan a siam chu kil hrang hrang atangin sawi a tam hle a. He dan hi tha an tih thu leh an thlawp thu MZP president chuan a sawi a. Politics-a inbeihna atan leh hnam dang pasal neiten an sawisel chiam mai chu mak an tih thu a sawi bawk.
Inkhawmah hian ‘I ram leh hnam humhalh la, khawvelin a dem lo vang che’ tih thupui hmangin, Prof. JV Hluna leh F. Vanlalrochana te chu panelist niin, Talk Show buatsaih a ni a, Govt. Aizawl College (Pol Sc. Dept) zirlai leh he huna sawm bikten zawhna siamin an sawi ho a ni.
‘Zoram Ni’ hi MZP Sub-Hqrs hrang hrangah pawh hman a ni.