Mizoram Assembly session neih meka Dampa bialtu MLA Dr R Lalthangliana’n private member resolution a put luh, Indian Air Force (IAF)-in Lengpui ram an lei chungchang chu a thu siam danglama pawm a ni.
Zirtawpnia Assembly session-ah Dr R Lalthangliana’n ‘Indian Air Force-in Lengpui ram an lei danah dan bawhchhiatna nasa tak leh corruption a awm ngei nia lang hi Mizoram mipui duh dan leh beisei ang ngeiin CBI-in an chhuichhuah theih nan Mizoram sorkarin rang takin bawhzuiin hma la nghal rawh se’ tih private member resolution a put luh chu member-ten an sawi ho.
Sawihonaah hian rorel lai member-te chuan he resolution-in a tum leh duh ber chu IAF-in Lengpui ram a lei chungchangah CBI hnena thlen an thlawp thu an sawi hlawm a. Hetih rual hian resolution-in a duh ang ngeiin CBI chhui turin kumin February 23-ah phalna pek a nih tawh avangin Mizoram sorkarin rang taka bawhzuiin hma la nghal rawh se tih chu telh a tul tawh lo va. Sorkar hmalak mekna a nih avangin siam that tul an tih thu an sawi hlawm.
Eptu member-te chuan CBI hnenah sorkarin phalna a pek chiang taka pek tih a hriat loh bakah, CBI-ah thubuai ziah luh a ni tawh em tih pawh hriat a la nih loh avangin resolution chu a ngai anga kalpui tha an tih thu an sawi ve thung.
Private member resolution put luh chungchang hi hun eng emaw chen member-ten sawi a, member pakhatin a sawi lai mekin in-auh buaina hialte a thleng a, chutianga an inhnial hnuah House Leader Lalduhoma’n IAF-in Lengpui ram an lei chungchang hi kumin February 23 khan CBI chhui tura pek a ni ngei tih a sawi a. Sorkarin CBI-in a chhui ngei a ni tih a lanna chu Assembly Speaker Lalbiakzama kaltlangin member-te a sem a, hemi hnu hian speaker ruahman angin resolution chu ‘Indian Air Force-in Lengpui ram an lei chungchangah dan bawhchhiatna nasa tak a awm leh corruption a awm ngei nia lang hi Mizoram mipuite duh leh beisei ang ngeiin CBI-in an chhui chhuah thuai theih nan Mizoram sorkarin rang taka bawhzuiin, chak takin hma la rawh se’ tia siam danglamin pawm a ni.